一周三件 - 錢雋 2015年10月16日
一周三件：中交建等爆升
■中交建今年上半年海外新簽訂單增31%。圖為集團董事長劉起濤。 資料圖片
中交建（1800）食住海內外斷萬億元計嘅勁厚商機，嚟緊幾年預測增長，越去越有，PE又至平，股價呢四個月仲橫行「dum dum chat」。中資逐瓣辣起，基建股未行，中交建等爆。
業務贏在起跑線
綜合資料，發改委單喺9月批復包括鐵路、公路等基建項目總投資，超過1.21萬億元人仔。據估計，阿爺喺穩增長下，今年基建投資，或達14萬億元人仔。又里昂最新評估，到2018年，一帶一路為中國企業帶嚟嘅海外定單，高達1.9萬億元人仔。基建股長中短線，係食到應。
中交建主打路橋、鐵路、港口各大型基建瓣數，據高盛統計，集團今年上半年海外新簽定單，增31%，拋離對手。中交建有多元瓣數，加埋海外競爭力，係架勢堂級數，更加贏在起跑線上。
場內專業評估，中交建今、明、後三年，EPS1.14港元、1.27港元同1.43港元，增長6.5%、11.4%同12.6%，3年預測9.4倍、8.5倍，同7.5倍PE。場內行家，隧道股份（滬：600820）3年25倍、22.5倍同19倍PE，中鐵（390）11.4倍、10.5倍同9.7倍PE，中鐵建（1186）10.5倍、9.8倍同9.1倍，中機（1829）11.7倍、9.7倍同8倍。又連同所有行家在內，今、明兩年平均預測18.7倍PE同15.7倍PE，中交建平咗一大截！
9月以嚟，最牛嘅摩通，睇中交建18蚊，即係集團現價（10.76元）要升67%。將呢個升幅打五折，博中交建升33%到14.3元，集團明年預測PE先得9.9倍，未有耐追到行家平均值之餘，呢個PE水位，一啲唔過太啫。
錢雋
細價股專家
本欄逢周一、三、五刊出
錢雋
一周三件 - 錢雋 舊文