魚樂無窮：環保新星的誕生
■港股失驚無神炒高逾400點，逼近23000大關。 李潤芳攝
港股失驚無神炒高逾400點，逼近23000大關，走勢看似雜亂無章，其實係大漲小回格局，亂中有序。不過，呢種市最蝦人炒，悶你一兩日，唔夠定力好易被震走，之後就睇住隻股一棍爆上，一殼眼淚。繼金風科技
（2208）後，上周推介嘅日東科技（365）亦順利破位，遲到好過無到，下一隻有機會爆上的，我睇好A8新媒體（800）。
環保概念股動力持續，津創環保（1065）、北控水務（371）接力炒高半成，粵豐環保（1381）曾漲7.6%後，大量沽盤狂質，最後打回原形，如此明目張瞻壓價，更顯事有蹺蹊，繼續等！
食髓知味，今日推介周初上市嘅環保概念股天潔環保（1527），三大賣點逐個數。第一，概念獨特；天潔主打大型除塵器，在燃煤電廠、冶金廠、造紙廠等工廠廣泛使用，港上市公司中絕無僅有，以銷售計為全國第三大製造商，出口計則為第四大，具領導地位，內地霧霾嚴重，天潔食正條水。第二，細粒易炒；H股市值4億唔夠，發行股數僅3,500萬股，有心人要炒起，三兩下手勢就搞掂。第三，股東增持；雖然上市不足一周，但大股東已出手增持，無他，水底價超值也！招股價10.9元，增持價10.08元，現價10.2元，值博率有幾高？唔使講得咁白啦！
唐牛
https://www.facebook.com/tongcow88
唐牛
魚樂無窮 - 唐牛 舊文