異動空間：大健康遺珠起動
市況結算前橫行悶局，600億成交失守2萬3，十個牛皮九個淡，睇嚟短線要殺一浸再炒過。比較理想係下月回調後，再炒到12月年結，恒指年底前仍有望挑戰24500點，完成黃金比率0.5倍反彈。
近排炒作體會可用九個字概括：只低吸、不高追、勿大貪。由於個市層層蟹貨，
信心仍弱，不論大戶散戶，大批資金已被鎖死，落場博反彈多數係搶雞糊，升得幾日就冇戲唱，到時先追九成中伏，但如低位打靶，轉頭又會炒番上去，左一巴右一巴經常出現。所以細注啲，多少少耐性，等升番上去至沽出，應可減少無謂的損失。
大健康板塊炒咗一排，最先炒上的恒大健康（708）已現疲態，資金疑似換馬轉掃中國9號健康（419），前者3點後散水時，後者突然發力抽上，何況剛行第一棍，值得小注追入，博追落後資金繼續湧入！公司轉型大搞O2O醫療保健服務，網上App「康迅360」將病人與全國醫師連在一起，進行網上初步診症，再結合網下就醫、健康管理、復康服務，概念食到應。公司仲搵來國壽、太平人壽、北京醫師協會等星級夥伴合作，業務逐步成形，絕對有條件靚仔反彈。
魏力
http://www.facebook.com/2012jason
魏力
異動空間 - 魏力 舊文