一周三件：晨訊脫胎換骨
■晨訊科技新拓物聯網，升值潛力高。圖為集團執行董事王祖同。 資料圖片
晨訊科技（2000）唔單止有半年靚仔業績，下半年打後，連埋新拓物聯網瓣數嘅營業數據，一路好睇頭，晨訊煲得掂物聯網呢瓣，就唔係家陣區區一個幾毫。
晨訊主打手機解決方案、無線模塊，兼新拓機器人
同物聯網瓣數。今年上半年，晨訊盈利一枝箭增長230%到1,646萬元，盈利基數低係事實，但下半年以嚟，除咗7月收入同比輕微下跌，由8月到10月，晨訊收入，同比分別大增94%、128%同近65%。而頭10個月總收入24.3億元，同比亦增加近42%。
睇好物聯網新業務
仲省鏡嘅係，內房銷售只係佔晨訊總收入雞碎咁多。即係話，主打瓣數發力，先係收入增加原因。
又喺晨訊收入當中，亦包括埋新拓物聯網。呢瓣製作，被業界喻為網絡發展嘅第三浪潮，講得出由智能家居、汽車，健康、運動水平監測，都同物聯網有關係。之前，諮詢機構高德納估計，物聯網產值會高達1.9萬億美元，折約14.8萬億港元，而IDC估計上到7萬億美元，即係55萬億港元，呢瓣網爆炸力，好驚人。
晨訊家陣約10億元市值，科技瓣數當中，細奀到不得了，但咪睇市值細，晨訊一樣諗計搵米路，兼食住呢鼓大潮流走，呢瓣煲得掂，晨訊脫胎換骨。
咪扯咁遠，晨訊有10個月靚仔數據，全年應該有盈喜，又集團現價0.445元仲係潛喺2005年上市以嚟近10年大底，得0.53倍PB，比起集團上市以嚟平均1.3倍PB，平咗近60%。煲晨訊，中線當翻半番到0.65元計數，先得0.86倍PB，未有耐追到上呢個平均值。
錢雋
細價股專家
本欄逢周一、三、五刊出
錢雋
一周三件 - 錢雋 舊文