中環在線：過百位客戶受惠
黃國英請睇Star Wars
■黃國英（箭嘴示）開場前順便同客人匯報基金表現。 受訪者提供圖片
《星球大戰》（Star Wars）熱潮湧入財經界！最近除咗facebook俾星戰公仔洗版，個別企業自己設計嘅聖誕卡亦以星戰人物作為造型；豐盛金融資產管理董事黃
國英趁噚日《星球大戰》系列第7集《星球大戰：原力覺醒》首日在港公映，仲包場邀請客戶睇戲。
《星球大戰》系列乃經典科幻大片，第一集早於1977年上映，38年來粉絲不斷增加，就算呢套戲唔係閣下那杯茶，咁多年點都應該睇過一、兩集，即使唔知套戲講乜，都肯定聽過佢首經典配樂。第7集近日上映，身邊好多人都在談論。
豐盛老闆黃國英好有心呀，一早喺銅鑼灣一間戲院包場，預咗600個位，邀請過百名客戶帶埋家人或朋友噚晚7點入場睇戲。
黃國英話，今次包場請睇戲大約花費十多萬元，主要想趁聖誕節前跟客戶聯誼一下。至於點解咁多套戲唔揀，要揀《星球大戰》呢？唔通佢係星戰迷？非也非也。
■黃國英循例同白兵合照。 
■長實樓神趙國雄（後排中）喺聖誕卡扮星戰武士。 
■富事高將同事嘅樣畫成星戰漫畫版。 長實送星戰聖誕卡
原來黃國英旗下基金重注買落迪士尼股票，迪士尼喺2012年以40億美元，收購《星球大戰》製片商Lucasfilm，《星球大戰》對上一套電影，講緊係10年前嘅事，星戰迷餓咗咁多年，市場預期今集肯定好賣座，順帶利好迪士尼股價前景。黃國英順理成章請客睇《星球大戰》，順便講句「May the Force be with you」。
另有企業用星戰設計聖誕卡，包括長實地產（1113）同顧問公司富事高，夠曬潮！
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com