股神撈油股
2016/01/15 09:02:27
網誌分類: 經濟
市場原本預期歐盟對伊朗的制裁，可能最快在今個星期解除，伊朗石油將會重出江湖，令到油價百上加斤，令紐約油價上日一度跌穿每桶30美元的12年以來最低水平，拖累美股連日大插至調整區域。但昨日歐盟表示將制裁伊朗的解禁時間推遲至1
月28日，刺激油價反彈，紐約期油反彈2.4%，收報31.2美元。
油價回穩，能源股造好，杜瓊斯能源指數大漲4.5%，推動美股反彈，杜指昨日升228點，收報16380點，升幅1.4%，收復上日大部份的失地；標普500指數重上1900點，收報1922點，升32點，升幅1.7%；納指近日跌得最傷，昨日彈力亦比較勁，升89點至4615點，升幅2%。
阿爺出手，令到人民幣回穩，市場將目光轉移到油價之上。油價近排跌跌不休，已經令到投資者心寒，外資大行繼續踩油價多一股，繼高盛睇每桶20美元之後，大摩日前又加入唱淡行列，話人民幣再貶值，油價有可能跌到20美元，渣打重誇，講到油價唔單止凍過水，仲會平過水，可能跌到每桶10美元（一桶相等於160公斤）。
不過，正當唔少分析猛話油價將會「無底下跌」的時候，股神巴菲特卻大手吸納石油股，CNBC昨日報導，巴菲特旗下的巴郡，已經連續六日，不停地掃入石油股，最近一宗交易是再買入90萬股Phillips 66 石油公司的股票，這隻股亦由3個月的低位反彈。過去六日，巴郡已經買入這家公司的股共500萬股，每股平均價76.58美元, 昨日收市價為74.37美元，賬面仍然輸緊錢。股神開始睇好石油股，會唔會對油價已經接近底有些啟示呢？
講到觸底，美股上日大跌，三大股指離去年年中高位已經回落10%，昨日反彈，市場開始爭論美股係唔係已經觸底？我覺得唔似啦。因為講到大市觸底反彈，大環境起碼要符合幾個條件，包括1.全球經濟特別係中國為首的新興市場回暖，2.人民幣匯價穩定下來，3.油價企穩，市場對聯儲局加息的預期降溫，4.比較微觀的是市場對美企有比較好的盈利預期。以上種種，相信唔會在短期內一一實現，所以大市仍有下行風險。
如果將美股走勢拉長一點睇，美股目前的位置其實認真唔低，標普500指數由2009年的700點一路升到2015年的2100點，即使近日回順，目前仍處於1900點上方。更重要的是截至去年8月，此前的4年，美股都未出現過有超過10%的調整。美股連續升咗7年，只係回調10%就了事？我覺得還未足夠。事實上，人同此心，見到美股仍有不少的下行風險，投資者入市的意欲大減，股票少咗需求，大市就無運行啦。值得留意的是，聯儲局於去年12月開始加息，多咗加息的因素，可以肯定的是大市將會比以前更加動蕩。
不過，睇目前情況，全球的市況又有些改善，首先係阿爺出手幹預人民幣匯價，開始出現成果，匯價回穩，股市亦無此前咁動蕩；紐約油價近日能夠守住30美元關口，對市場氣氛有些幫助。更重要的是，油價大插，已經令到美國通脹停滯不前，甚至可能出現通縮的危險，聯儲局少咗連續加息的藉口，加息預期下降，對股市係好消息。估計未來美股仍會隨著上述四大因素，波動尋底。
陸羽仁
回應(4) 我想回應
陸羽仁 BLOG 舊文
來源 source: http://blogcity.me