一味靠嚇
2016年01月15日
未知世事常意外，尤其股市更難估。離岸人民幣經過周二大夾息日後，稍為穩定下來，港股隨之反彈。點知跟住又到美股唔掂，杜指一舉大插364點，各指數全部下跌之餘，石油、黃金商品齊齊跪低，顯示市場對經濟前景憂慮未散，中國金融震盪繼續纏繞全球。港股開市直插三百幾
點，諗唔到之後又比佢鬧要上番，最後只跌百幾點，已經算係叻啦。
港匯軟落見十月低位
美股跣腳，但內地喺三千關有支持力，上證指數先跌後升，喺三千點樓上收市，港股食晒驚風散。恒指低開後，初段跌幅擴大至425點，但19500點暫見支持，加上內地股市午後急彈，港股跌幅顯著收窄，19800點失而復得，恒指收報19817點，跌117點；國企指數收報8459點，下滑34點，成交金額754億元。
由於美股碌低，加上港匯回軟，見七點七七水平，係十個月低位，匯市風暴仲係陰霾未去。今個星期人民幣匯價激盪，中央出到托匯夾息同大鱷對撼，暫時壓住投機者氣燄，但人民幣匯價能否穩定，始終係關鍵。內地收緊離岸資金供應之餘，再抽高利息打高炒家，但新華微訊就發文，話家銀行換匯安排正常，一於扮無事。不過，部份「分析家」愈唱愈淡，甚至話一年跌三成。唱淡者邏輯好簡單，過去日圓累積都跌咗三成。過去一年人民幣跌咗一成，咁即係話若然經濟唔好，中央容許人民幣一年跌一成，睇嚟內地經濟今、明兩年都唔會好，咁一年跌一成，三年咪跌三成囉。
金融市場恐慌情緒總係愈講愈嚇人，將人民幣唱到變咗「人民弊」，但呢個一年跌一成、三年跌三成的小學雞計法，明顯就漏洞百出，如果係咁，日本經濟衰咗二十年，咁日圓咪跌到負值？唔怪得喺人仔匯價下調之際，阿爺懷疑有人製造恐慌啦。喺人民幣未貶值前，好多人都話人民幣毋須貶值，仲拿出好多經濟理論支持，包括中國國際貿易長期有盈餘，中國無龐大外債，以及手頭有龐大盈餘等，喺咁嘅情況下，點解突然話人民幣會突然大貶呢？
以中國或美國呢啲超級大國，貨幣幣值唔止係經濟因素決定，仲係政治、軍事等綜合國力決定。人民幣若然大貶三成，最傷唔係中國人，因為中國人大部份係用中國本土生產的商品，幣值貶唔貶對他們影響唔大，最傷係同中國競爭的國家，所以有人形容貶值係把本國貧窮輸出給鄰國。如果中國大幅貶值，日本同亞洲國家必然重創，全球經濟都會陷入不明朗，最後必然扳倒美國。美國過去長期要求人民幣升值，直至過去一年美國經濟明顯改善，先至停止咗要求升值的聲音，所以可以話，人民幣家有秩序下調，係中美同時接受的情形，但咁唔代表美國會接受人民幣會大幅貶值，所以人民幣勁跌三成，現階段只係可以聽來得啖笑。
避險貨幣未必避險
雖然咁講，但唔代表我覺得人民幣家即刻無晒事。我只係想指出，喺市況混亂下，其實怪論或者怪現象唔止一個，譬如有人將人民幣轉走，話不如買澳元、日圓避險啦！如果睇真啲，人民幣現時貶值，主要係兌美元而言，兌其他貨幣只係個別發展，需知其他地區的貨幣係市場自由浮動，無人行維持秩序，波幅其實比人民幣不遑多讓，尤其好似日圓、澳元，佢哋本國經濟同中國關係密切，若然中國唔妥，匯價下挫，這些國家一樣無得獨善其身，所以如果驚貶值要賣人民幣，最合理做法係換番做港元，因為港元同美元掛鈎，家美元係最強勢主要貨幣，而且香港人主要消費係香港，持有港元係最簡單，反而換入其他貨幣，如果時間同價位掌握得唔好，俗少少講隨時變成由一個屎坑跳入另一個屎坑，白費心機兼浪費氣力！
陸羽仁
金融High Tea 舊文
來源 source: http://hdfin.stheadline.com