應對大鱷只宜智取
2016年02月02日
量子基金創辦人索羅斯唱淡內地經濟硬着陸，跟住大鱷就紛紛「蒲頭」，個別仲擺明話正在沽空中港資產，看來即使阿爺口誅筆伐，淡友都唔會咁易收手。港股昨日跌87點唔算多，但期指低水百幾點，小心有人不斷開緊淡倉。
日本央行出其不意實施負利
率，推動全球股市爆上，尤以歐美股市升幅最為顯著。但相對於早前的跌幅，中港兩地股市的反彈力度就稍弱。外資打埋開口牌，話唔睇好兩地前景。
昨日比較多人講係美國對沖基金Hayman創辦人Kyle Bass透露，用百億美元沽空人民幣同港元，佔佢組合差不多八成半資產值。呢位大鱷仲作出驚人預測，估未來幾年人民幣會貶值四成。
高位力頂中正下懷
大鱷呢排好似大合奏，內地官媒對索羅斯大張撻伐，揚言沽空中國必然會損手爛腳收場。阿爺反應咁大，或多或少係睇到熱錢來意不善，如果唔採取聲大夾惡的方式回應，好容易就陷入被動，跟住被人牽住鼻子走。國際大鱷唔係善男信女，佢哋話畀大家知自己沽空中港資產，最主要當然唔係想益大家發財，家希望產生羊群心態，推低個市，咁佢就得其所哉。
大鱷沽空要搵銀，喺高位放貨唔係最難，最難係要低位買番貨平倉，最好做到買貨時仲有好多人沽貨俾佢買，唔至於一買就大幅炒上，佢先可以完成低位食胡平倉步驟，然後先至能夠完成整個「掠水」部署。喺1998年亞洲金融風暴，淡友大戶一直殺落5800點樓下，仲搵本友好雜誌大唱港股要跌到3000點，淡友本來應該趁個個心驚膽戰佢就入番貨平倉，點知半路中途殺咗特區政府出來入市買貨，頂高個市，令大鱷最後無辦法乘亂平倉，成個狙擊咁先功虧一簣。從呢個角度睇，無論係政府抑或散戶，應對大鱷力敵不如智取，既唔可以唔信沽空大戶講，但又唔可以盡信。
沽空大戶睇淡，唔係一味出口術，佢哋有齊充份調研先郁手，所以應對方法，唔係喺高位同佢鬥頂，唔畀經濟或資產價格調整或回落，而係應該鬆鬆手等市場發揮力量，等資產價格去到低位先同佢鬥入貨，等佢無得平倉。因為高位你同佢鬥頂，就方便佢出貨，但低位先搶貨，沽空大戶個倉咁大，點可以一時三刻買齊先，所以，去年阿爺講明喺四千點樓上托A股，等如借個膊頭俾人踩住上。
至於散戶首要係睇自己有幾多銀彈，銀彈唔多就要保留實力，最好係等大鱷殺倉落嚟時執平貨，所以想係大時代鱷口偷點金，最緊要講自己有無持貨能力，同淡友鬥長命。 內地昨日公佈數據，印證唱淡大戶唔係一味吹水。今年1月份，中國非製造業PMI為53.5%，按月下降0.9個百分點，消息公佈後上證一度跌幅擴大至3%，臨近尾盤兩市有小小回暖，上證全日收報2688點，回落48點，跌1.8%；深成指數報9322點，跌96點，跌1%。
業績走樣 國壽急挫
內地氣氛差，恒指高開後回落，一度瀉239點，低見19444點。恒指收市跌87點，報19595點；國指收報8144點，下滑96點，成交縮至近695億元。喺唱淡內地氣氛下，中資金融股表現曳。國壽(2628) 15年下半年業績走樣，股價挫4.2%，報18元。長城汽車(2333) 向國家質檢總局備案，決定召回部份長城C20R汽車，長汽收造5.51元，挫6.8%，為包尾國企指數成份股。匯控(005) 鍊住荷包，決定全球凍薪及暫停招聘，股價全日微升0.28%，造54.65元。
日本掟出負利率呢招，但港股咁快洩氣，顯示大戶同散戶都係抱住安全至上嘅心態。如果外圍無重大利好消息，指數真係唔易突破兩萬點。
陸羽仁
金融High Tea 舊文
來源 source: http://hdfin.stheadline.com