保險股 好驚險
2016年02月04日
一月效應剛過，美股就即刻插水295點，港股未開市都知衰梗，結果插穿番萬九點收市，最低跌過682點，收市跌455點，其實已經唔算誇張，不過重災區係保險股，皆因內地為減少資金外流，收緊內地人買境外保單限制，令境外幾隻保險股急插。
講兩句大市先，
近日期指經常低水，顯示不斷做淡倉的力量唔細，扯住大市，做淡易過做好。再加一個負面因素，係港元匯價再開始回吐，港匯本周一反彈到7.7731呢一個反彈浪的高位之後，周二急回，港匯最低7.8019，又見番7.8呢啲位，昨日亦一度低見7.8006，收市好番少少，收7.7932。小心淡友得閒又插吓港匯，玩吓提款。有個中環茶友講笑話，老外淡友在香港股市有「特別提款權」，一隊港匯又來股市提款。
中國銀聯突然宣佈，境外購買保單每次刷卡買保險上限為5000美元，拖累多隻保險股急挫，近年成為傳統藍籌股擂台躉友邦保險(1299) 一度跌超過9%，為逾四年最大單日跌幅，後來反彈咗唔少，收市跌4.9%。
彈後無低撈水位
內地出招的主要係近日人民幣匯價受壓，有人透過喺內地用銀聯卡買保險，變相將資產轉移成外幣出境，呢個應該係內地應對人民幣匯價受壓，堵塞漏水的措施。喺消息影響下，重磅藍籌友邦保險，早段一度急挫9%，低見37.1元。後來消化咗消息，市場驚魂甫定，佢股價先逐步收復失地，收市跌4.9%或2元，報38.95元，成交達54.3億元。其他保險股如宏利金融(945) 收報101.2元，跌5.1%，幅度仲略多於友邦；內險股的中國平安(2318) 收報32.95元，都跌3.2%。
阿爺突然用隻手指塞住個窿，保險公司食呢條內地水食咗好耐，好多經紀話家靠晒內地客開單，阿爺出招後，市場擔心保險公司水源受阻。但外資大行計過數後，都紛紛發表報告力撐友邦。德銀、匯豐、美銀美林及野村繼續建議投資者買入，摩通及摩根士丹利同樣維持對友邦增持的投資評級。德銀更認為，友邦股價下跌，是買入的機會。
瑞信估計，友邦目前只有大約三成的新業務價值是來自內地客戶，所佔比例已較同業為低。美銀美林及德銀則認為，今次銀聯嚴格執行規定，對友邦新業務價值增長的影響只會介乎2至3%。
至於看法最淡的要算中金，雖然同樣建議買入，但同時將友邦目標價大劈13%，至52元，主要認為新安排會令友邦於本港的總加權保費收入大幅減少三成，預期短期股價會明顯受壓。
今次阿爺出招，主要唔係想對付保險公司，而係防止有人趁混亂借買保險走資。「借買保險走匯」的生意，遲早都會被截，所以呢類收益唔應該有好高估值，長遠友邦股價應該睇本身業務增長潛力，而唔係突然因為匯價考慮的大額保單。從買股角度，昨日佢直插9%有點反應過敏，但彈完後短線追貨價值已唔高。畢竟個市仲未尋到底，咁佢最終都難免受影響。
內房好消息遇跌市
昨日藍籌股大致向下，渣打(2888) 仲首次跌穿50元大關，全日跌5.4%，收造48.7元，幅度仲勁過有負面消息的保險股。聯想(992) 公佈第三季業績勝市場預期，全日反而暴瀉10.2%，報6.61元，為全日跌幅最大的藍籌股。
內地再出招救樓市，人行下調房貸首付比例至20%，為樓市「去庫存」，惟港股急挫，呢個好消息獨力難支，內房股都未能倖免，中海外(688) 跌2%，華潤置地(1109) 挫2.3%，民營內房跌幅大啲，富力地產(2777) 挫4%，融創(1918) 跌3%。阿爺沖喜招數令內地股市只是微跌0.4%，但敵不住港股的淡勢。
陸羽仁
金融High Tea 舊文
來源 source: http://hdfin.stheadline.com