操盤手劄記：大市回調 低吸盈喜股
香港真係越來越荒謬，民居附近出現泥頭山，當局竟然係叫業主加固，而唔係移走泥頭。舊年9月新學年以來20名學生自殺身亡，唔得掂局長竟然係叫學校、老師、家長加把勁，而唔係檢討教育制度。公立醫院病房爆滿，病人要喺急症室滯留3晚，特首唔去諗辦法解決，反而去
諗IFC一帶興建岸邊泳棚，荒謬到令人O嘴！
鬚刨頭建築物IFC，係香港作為國際金融中心嘅標誌，好多國際金融機構喺度駐紮，喺度返工嘅，我諗無乜邊個lunch hour夠時間食完晏去遊水。畀你真係遊20分鐘，維港海水每百毫升含1,702個大腸桿菌，睇怕遊完要入醫院，而醫院已經爆滿。有錢起泳棚，不如擴建醫院啦！
言歸正傳，講番股市。中國外滙儲備繼續減少、外貿數據差過預期，加上商品價格回吐，拖累港股本周表現，恒指昨收19996，跌15點，已連跌3日。港股上周反彈皆因跌過龍，下一階段反彈，要由有盈利增長嘅實力股帶領。今日焦點係中國2月CPI及PPI，以及歐洲央行議息。
通達放榜有睇頭
踏入業績期，我比較留意盈喜股，近日心水係下周三放榜嘅通達（698）。通達係電子產品外殼一站式服務供應商，日前預告2015年度純利將按年增加35%至40%。按2014年賺5億元計，即2015年約賺7億元，以此推算，市盈率約10倍，相對其他手機及平板電腦零部件生產商如瑞聲（2018）、舜宇（2382）等平均16倍估值，折讓近四成。
通達純利大增，皆因營業額及毛利率相應增加，令綜合毛利持續提升。營業額增加主要來自手機業務引入金屬外殼產品，以及其中一位主要客戶貢獻大增。集團手機業務主要客戶包括：華為、中興（763）、聯想（992）、酷派（2369）、TCL通訊（2618）、諾基亞、小米、OPPO等。
最大客戶華為管理層預計，今年智能手機出貨量將按年增加三成，又期望3年及5年後市佔率分別超過蘋果及三星，成為全球最大智能手機供應商。小米亦不甘後人，隨即推出旗艦手機「小米5」應戰。客戶有作為，通達生意有支持。
此外，通達提出分拆手提電腦及平板電腦外殼製造業務上市，有助釋放價值。睇走勢圖，股價一路守住2013年12月至今長期上升軌底部之上，昨收報1.31元，呈現區域上軌突破利好訊號，可趁低吸納，睇1.5元，穿1.2元止蝕。
割柑人
本欄逢周四刊出
割柑人
操盤手札記 - 割柑人 舊文
來源 source: http://hk.apple.nextmedia.com