業績好 先食胡
2016年03月10日
港股繼續在低淡成交下浮沉。港股跟隨內地股市下跌，但恒指20000關爭持後成功死守，收報19996點，跌15點，國指收報8441點，下滑63點，成交跌到569億元。
藍籌公司繼續宣佈業績。國泰航空(293) 去年全年業績，盈利60億元，同比
大升91%，每股盈利152.5仙，派第二次中期股息每股0.27元。市場關注燃油對沖問題，集團期內燃油總額減少145.61億元或37.8%，平均油價下調40.3%。燃油仍是集團最大成本，佔2015年營業成本總額的34%(2014年為39.2%)。燃油對沖虧損削弱燃油成本下降的利好影響。期內燃油對沖虧損為84.74億元，較上年的9.11億元大增75.6億元。計及對沖虧損後，燃油成本較2014年減少73.31億元或18.2%。
國泰受油價左右
國泰燃油對沖虧損可控，消息公佈後，國泰股價造好，收報14.04元，升5%；不過，國泰業績大漲同低油價好有關，油價能否長期咁低，相信係基金評價公司的重要考慮，如果股價短線再上，可以考慮先食胡。
最近有兩單消息同採礦公司有關，一單係中信集團澳洲鐵礦石公司要再撇132億元，另一單係國際資源(1051) 出售金礦。
先講中信為鐵礦石撇帳，由於虧損巨大，分析師估計好大機會搞到公司業績大跌。呢個礦對中信集團可以用「執條襪帶累身家」形容，為咗呢個收購，佢買過大批澳元衍生工具輸大錢，跟住多年要為個礦不斷投入，但喺鐵礦石大跌價下，基本上投入多，收入少，搞到年前母公司要將整體業務注入來支撐間公司。
呢次公司再撇帳，有人估係咪洗太平地，把衰嘢大清理，期望鐵礦石價錢日後好轉時可以翻身。不過，就算係咁，家中信本身金融業務撞正內地市況低迷，都相當惡搞，兩樣加埋短期都幾難哽。
另一單係國際資源賣金礦，結果喺小股東反對下通過。根據交易安排，國際資源會出售位於印尼北蘇門答臘的Martabe礦山項目。公司估計，是次交易稅前淨額是7.63億美元，擬用於自營投資業務、拓寬金融服務業務、房地產投資及一般營運資金。
換言之，公司今後將會轉型，不再成為礦業公司。
不過，持有集團8%股權的資產管理公司貝萊德(Black Rock)近日去信股東，反對集團出售該項目，認為主要資產Martabe礦山生產成本低、開採期長及勘探潛力大，希望股東於周二(8日)舉行之股東大會上投反對票，結果方案喺超過四成小股東反對下通過。
睇番呢次交易，大小股東各有理據。大股東覺得有人出好價，應把握機會出售；小股東就認為個礦採金成本只係700美元，無理由賣咗佢。國際資源去年第四季度及全年，銷售黃金及白銀所得收益分別為9800萬美元及3.92億美元，貝萊德係大型投資基金，入得股相信係做過調研，覺得公司礦業有前景，佢有大把錢要投資，唔急於賣產套現好正常。關鍵係公司套現大筆資金，無話有好清楚用途，又無話會大舉派息，咁會令小股東好被動，所以提出反對。
股東睇實國際資源賣產巨資
國際資源喺賣產消息後，股價炒上咗，但同高位仲有差距。家公司市值51億元，俾套現所得仲要低，點解股價只有咁反應，皆因回籠資金點用家唔清楚。過去，有好多公司出售核心業務後，用啲錢高價買嚿「擦字膠」(無用的資產)，嚿膠擦擦吓就無晒，小股東就一殼眼淚，國際資源喺賣產時無話會派高息，小股東自然擔心，當然希望有基金股東幫佢出頭，同埋留意幾時係出貨時機嘞。
陸羽仁
金融High Tea 舊文
來源 source: http://hdfin.stheadline.com