智取大市：尋找屈機的故事
■核電概念股同深圳上市大折讓H股未被大炒，要搵股炒，可在這兩板塊中尋。 資料圖片
上星期五熱炒嘅科網股、濠賭股，嚟到今個星期一只有個別科網股持續升勢，即使有得升，當然冇上星期五咁勁啦，濠賭股直頭顯著回吐。上一期講過值博嘅證券股，炒到曉飛，耀才（1428）同英
皇證券（717）升夠一成。同一條formula之下，與其揸住已成焦點、好消息通曬天嘅證券股，不如同搵其他蠢蠢欲動嘅低殘股去博一棍好過。
環顧各板塊，仲有核電概念股同深圳上市大折讓H股未大炒一棍，呢兩類股都見成交開始異動，股價喺低位又守得住保歷加通道中軸，有機會短線開鋪大，要搵股接力證券股炒，可此中尋。
雖然小弟唔信「深港通」有乜睇頭，內地鎖國之下，外資唔肯入嚟，哪有錢透過喺「深港通」之間流來流去？不過，既然「深港通」近排日日講，只要有大陸傳媒喺人多擠逼之下大叫一聲「開通啦」，點都有人前仆後繼衝入去，概念股仲要單日升夠10%以上，大家先覺得故事夠堅，更容易引人入局。似乎「深港通」概念有得炒嘅機會略高過核電股，選擇來來去去幾隻，山東墨龍（568）、東北電氣（042）同浙江世寶（1057）。呢3隻股不約而同即日出現假動作，衝一衝再打番落嚟，全日拉勻冇乜升，似係試車多過衝一嚇就要落閘，所以策略上都係開市略強就小注跟進。一句講曬，有得順勢炒，就炒咗先講「明日之後」。
晉佳
https://www.facebook.com/advanceguy1/
晉佳
智取大市 - 晉佳 舊文
來源 source: http://hk.apple.nextmedia.com