做生意不如玩財技
2016年03月22日
中美股市造好，滬股七連升，尾盤仲係券商板塊再度發力下，上證綜指重新奪回3000點關口，收報3018點，大升2.2%。奈何港股見到中、美升都唔升，好似天氣還寒乍暖，窄幅波動。恒指收報20684，升12點；國企指數收報8928，上揚45點，成交金
額801億元。港股成交放大而唔升，有少少沽壓也。
之前美股升港股唔郁，就話俾大陸拖往，如今大陸大升港股又唔郁，就露出本地股市個弱底。恒指升近21000大關，外資唔太睇好，就約束咗升幅，未來不一定唔升，但即使外圍升，港股跟升，亦似會打折。
中國證金公司宣佈全面恢復「轉融資」業務五個期限品種，內地券商股表現突出。廣發證券(01776) 去年多賺1.63倍，抽升10.4%，報18.46元；華泰證券(06886) 大升10%，報17.56元，為升幅最大的國企指數成份股。
恒基系繼續送紅股
藍籌昨日公佈業績，焦點係恒基地產(012) ，集團去年基礎盈利110.09億元，按年上升12%，高過市場預期，派末期息1.07元，另10送1紅股。四叔又出送紅股呢招嚟頂股價啦，正所謂招唔怕舊，至緊要受。
至於佢旗下的煤氣(003) 早前公佈去年核心純利按年跌3%，就被德銀發表報告，評為差過預期按年升7%。雖然煤氣繼續送紅股，仍被德銀指預期市盈率達20倍，比內地燃氣股平均12倍高，重申「沽售」評級不變。
該行認為，煤氣估值貴，預期市盈率達20倍，比內地燃氣股平均12倍高，重申「沽售」評級不變，目標價13.5元(昨收14.3元升0.8%)。中環茶友話，煤氣年年玩送紅股谷起個價，股價逐漸偏離基本價值，唔太值得再跟啦。
中國3D數碼(08078) 及匯友資本(08088) 聯合公佈，中國3D數碼將以4.08億元，收購HMV的81.63%股份，代價係發行中國3D的代價股份，佔中國3D已發行股本約22.59%，匯友由此成為中國3D的最大股東。中國3D數碼主席蕭定一話，收購帶來協同效應，希望在今年內設立網頁或手機版HMV，全力發展網上業務，集電視、電影及音樂於一身。
由於今次交易，匯友資本帳面上會有獲特殊收益2.24億元，記者就問到會否派發給股東，匯友首席執行官何智恒好坦白咁講，目前暫未考慮，強調集團是資產管理公司，需要資金維持營運。
睇番呢單交易，其實都係互換公仔紙遊戲，匯友用一檔零售生意，換一間創板公司的股票，着唔着數就見仁見智，但由於今次不涉現金，好有財技味道。既然賣家無現金落袋，咁樣點搵錢派息呢？所以消息公佈後，匯友股價反應唔大，收報0.213，升2%，市值15.9億元，中國3D數碼就升1%，收0.495元。
實惠買冠名廣告惹質疑
零售生意難做，呢類公司一有動作，就俾人質疑佢係玩財技。好似上市公司時富投資(1049) 屬下的實惠集團，傳出用幾百萬包起網上電視的冠名節目，立即惹起連番質疑，有中環茶友話，而家零售生意難做，幾百萬等如實惠對上一年幾成利潤，咁做值唔值呀？皆因實惠走大眾化路線，銷售對象係成年人，佢幫襯嘅網視主打戲謔路線，對象係年輕人，似乎唔係咁啱波路。
我就話事情不能只看表面，如果實惠大破慳囊搞網上廣告，不是為谷生意，只係為谷知名度玩財技，咁條數計法就好唔同，因為玩財技講緊上落係八、九位數字，如果用七位數字去玩財技成功，條數計落又唔同，不過，呢個就係非一般的生意經，一般人睇唔明，先至會鬧佢掉錢落海啫。
陸羽仁
金融High Tea 舊文
來源 source: http://hdfin.stheadline.com