操盤手札記 - 割柑人 2016年4月14日
操盤手劄記：雲圖市場 汰弱留強
近日人氣最高嘅連續劇，非「梁家婦女」主演嘅《當CX遇上CY》莫屬，但講到劇情，就唔及《大婆小三換樓記》咁juicy喇！Anyway，呢兩套劇都將政商權貴醜惡嘅一面，尤其面對power、money、sex之時嘅醜陋暴露無遺，睇到觀眾想嘔，絕對係一路睇一路纖體之作！
受俄羅斯與沙地同意石油產量封頂消息刺激，隔晚歐美股市受油股帶動上揚，加上IMF調高中國經濟預測，以及中國貿易數據改善，中港股市昨日借勢上衝。滬綜指收3066，升1.4%；恒指收21158，升3.2%。港股大陽燭兼大成交936億元配合升勢，擺脫4月以來，高開低收日子成交額較高，低開高收日子成交額較低嘅困局。
搵食要捕捉大戶手影
今個星期係中國「超級數據周」，周一公佈3月CPI、PPI；昨日係3月進出口、FDI；明日就係3月零售銷售、工業生產、固定資產投資，以及首季GDP等。現時大市炒數據概念，小心數據過後又要回調，等季績再炒。講到業績，老實講，業績好醜唔係最重要，大戶點睇前景先係關鍵。喺股市搵食，要捕捉大戶手影是常識吧！
外資行瑞信上個星期向15個國家、320家機構投資者進行問卷調查，結果顯示大戶由舊年睇好歐洲市場，今年轉為睇好亞洲市場（日本除外）。喺亞太區，以睇好比例計，香港上市嘅H股排第三，港股排第四。過去兩年，投資者最睇好科技，今年就最睇好醫療，其次係互聯網。
自從舊年總理李克強提出「互聯網+」，推動移動互聯網、雲計算、大數據、物聯網等發展後，互聯網概念股隨即大展拳腳。市場研究機構IDC數據顯示，內地共有雲未來兩年嘅年複合增長率超過30%，私有雲亦相若。軟件商紛紛拓展雲服務，包括我嘅愛股之一金山軟件（3888）。
其實金軟早已喺雲市場拓展版圖，經多年佈局及資本投入，比對手佔有先機兼具有優勢。管理層日前表示，「金山雲」業務已非常接近收支平衡，最快今年底或明年初開始有錢賺。「金山雲」舊年收入係前年的4倍，今年目標再翻一番。
金軟今年催化劑包括：一、雲業務持續增長；二、旗下獵豹移動毛利率回升；三、旗下西山居將推出3款新遊戲；四、非通用會計準則之淨利潤率回升。該股昨收報19.28元，升2.1%，創一個月高位，可候18.5元附近買入，睇20.8元。
割柑人
本欄逢周四刊出
割柑人
操盤手札記 - 割柑人 舊文
來源 source: http://hk.apple.nextmedia.com