睇住散戶嚟夾
2016年04月14日
港股呆咗成個星期，成交見晒底，之前外圍升港股無乜力水，當你以為佢唔得時，又突然借住內地出口數據好轉發難，大力夾上654點，成交升到945億元。雖然個市勁夾，但個市玩的人唔多，大戶夾起上嚟零舍爽手，無甚阻力。
其實中港股市氣氛本來只是觀望，散戶
睇淡人多，大戶借勢出招。昨日差不多開市時間，國家海關總署公佈數據，顯示以人民幣計價算，內地3月份出口按年上升18.7%，進口下跌1.7%，兩者都好過市場預期，出口仲結束咗持續8個月的負增長。海關總署形容，現時中國外貿發展中存在的困難依然較大，不過，出口先導指數回升，反映今季出口有望逐步回穩。
大戶就借呢個消息搶攻，指數節節上升，好快已經升逾400點。午市指數重上21000大關後仲未肯停，在三點內地收市後，港股臨尾買盤持續湧入，挨近全日高位收市。恒指飆升654點，收報21158點，升幅3.2%，遠高於內地股市的1.4%升幅；國企指數收報9191點，上漲349點，成交金額936億元，上升股份超過1200隻。
出口數字 有利好友
今次爆升藥引係出口數字，市場關注點係周五公佈的增長數據。中國一季度國內生產總值(GDP)將於周五公佈。市場預期，中國一季度GDP增速為6.7%，去年第四季度為增長6.8%。大行喺事前紛紛營造預期，等候郁手炒作，大行拋出數字等如開盤。有兩點情況我先前提過，家愈睇愈似。一個就係中美好似喺二十國峰會後對貨幣政策斟掂數，美國有意放慢加息步伐，換取中國維持匯價穩定，避免觸發全球金融不穩；第二就係散戶愈唔信個市炒得，大戶就愈夾高，呢啲一日升600幾點的日子，你做咗期指淡倉，睇怕都要斬倉啦啩。
阿爺見近排無人砌佢，自然出口術唱好自己。國家發改委同一時間就宏觀經濟運行數據舉行發佈會，發言人打埋開口牌，形容現在評價中國一季度經濟實現「開門紅」，應該是客觀的，是實事求是的，是有充足依據和充份支撐的。聽佢語氣真係落足力維穩同唱好。自從經過去年政策牛突然死亡同暴力救市後，好多人對阿爺影響股市嘅力量失咗信心，阿爺托市能唔能夠托到經濟好番，真係無人敢講，我都希望阿爺得，但中國咁大隻船要轉身，唔係話咁易。不過說到底，當股市係低水位，中央左右短期走勢嘅力量始終有番咁上下。
單邊睇淡 大戶易食
港股亦同本地經濟狀況脫脫哋鈎。本地市面麻麻，有啲裁員凍薪消息傳出。但有經紀行大老闆對陸羽仁話，千祈唔好睇住本地經濟嚟炒股，因為大戶最興和散戶做對家，殺到佢哋一頸血。本地經濟差，散戶心情淡，係咁走去試沽期指，大戶等到散戶儲番咁上下淡倉時，就開大托高。睇番美銀美林公佈本月1日至7日進行的調查報告，結果話投資者好多增持現金，比例由3月的5.1%跳升至5.4%，投資者信心亦降至18個月低位，意味散戶對市場前景感到不安，同時削減股票比例，咁即係話散戶睇淡多，呢個時候夾上就會食得好應，所以唔排除散戶唔信，大戶仲會再夾高啲。我估到大家都信中國經濟企定，散戶轉頭睇好時，個市先會回頭。
好友呢一輪攻勢係借出口發動，低殘嘅航運股昨日大炒一輪，細細隻的太平洋航運(2343) 應聲飆25.4%，造1.53元；大啲嘅中海集運(2866) 升近10%，報1.98元；其餘中外運航運(368) 、中海發展(1138) 、中國遠洋(1919) 都抽升6、7%。早排大股東增持嘅大連港(2880) 暫升2%，有可能炒吓落後都唔奇。
陸羽仁
金融High Tea 舊文
來源 source: http://hdfin.stheadline.com