智取大市：TVB好需要亞視
■TVB市值127億元。 資料圖片
小弟早已罷睇TVB（511，電視廣播），對上一次坐低睇TVB，原來係上外母屋企食飯的時候。其實，本來外母睇亞視的，只不過亞視執咗笠，唯有睇TVB。呢一刻我突然發現，TVB係好需要亞視。
做人做傳媒做電視，唔一定要走在時代
最尖啄，但最怕做咗最老套、墊底的一個。去到呢一日，即使有後生觀眾鍾意睇TVB，但敢睇又唔敢認，驚俾人恥笑，久而久之呢間電視台就冇人睇、冇人講、冇人問、冇人想鬧。電視台怕墊底，就等如小學全班最矮嘅男仔一樣，個設定就係要俾同學仔恰，一日最矮，一日都冇運行。以前未有網媒嘅世界，TVB電視界嘅最頂層，亞視就係最低層。時至今日，網媒當道，又有新電視台出現，大家可以隨時隨地煲美劇韓劇，大陸劇亦早已拋離TVB膠劇。
今日連師奶都開始唔睇TVB，慢慢剩番長者觀眾，或許90後讀者未必知道，今日嘅TVB，慢慢同廿幾年前嘅亞視一樣餅印，冇後生仔追、冇明星俾人睇、又開始蝕錢，皆因舊年TVB持續經營業務虧損，末落特徵出曬嚟。TVB相比20年前亞視優勝之處，係持有26億元淨現金，應該有排搣，但現金是阻止不了衰落。市值127億元嘅TVB，一度連翠如BB股聯旺（8217）都不如，到時可能連殼股都不如。
晉佳
https://www.facebook.com/advanceguy1/
晉佳
智取大市 - 晉佳 舊文
來源 source: http://hk.apple.nextmedia.com