笑到最後：解決紛爭 樓價必升
■每個社會都會有爭拗，紛爭得以解決後，經濟必然起飛。 資料圖片
投資者應該將情緒化、政治性嘅言論過濾，然之後將一啲所謂專家嘅言論視為一件事件，用嚟分析利好或利淡情況係咪已經浮曬面。直接啲講，當某啲專家權威發表一啲極度悲觀嘅言論，或者已經係一盞燈。因為每個
人都喺個棋局入面，自己睇錯好正常，所以有時都要搵啲專家做嚇明燈、指嚇路。
樓市出現跌勢之後，香港經濟被人睇到淡一淡，加埋自由行數字下降，好容易令人以為經濟陷入寒冬，甚至講到香港就快陸沉。最近更有「經濟教授」話，「如果港獨樓價跌九成」。當有最悲觀嘅意見出現，倒返轉諗，可能見咗底都唔出奇。
每個社會都一定會有爭拗，經濟發展到一個時期，出現既得利益同未得利益，意見大致上會分成「維持現狀」同「改革體制」，類似今日香港藍絲同黃絲之爭。而喺紛爭得以解決過後，經濟都必然起飛。
文化較接近嘅亞洲，最先有紛爭嘅係日本，喺60至70年代，日本出現學生運動，有個叫全學共鬥會議，簡單啲講，班學生感染咗共產主義瘟疫，同警察對峙又有，防暴警駐校睇場又有，但唔肯定當年有冇日本經濟教授預言「日本樓價跌九成」之類嘅悲觀言論。結果，80年代日本經濟起飛，去到89年日經指數上近4萬點，日本樓升到上天。
南韓、台灣都試過類似情況，80至90年代仲做埋亞洲四小龍。只要個社會搵到一個方法，例如投票，去解決紛爭，之後雙方慳番啖氣，寧願各自各為利益發展，經濟股市自然會向好。倒返轉頭睇，拗得最激烈、專家最悲觀嘅一刻，可能就係見底嘅時候。
若用「爭拗解決後經濟起飛」呢個角度嚟睇，最有潛力國家係緬甸，因軍政府願意讓步，首次有民主選舉，終於拗完，經濟遲早起飛，但係緬甸仰光交易所舊年12月先開，太新，「投資緬甸」只係屬於高明呢啲評論人吹水階段。
另一個市場就係香港，因為爭拗真係好嚴重，換句話，如果解決到爭議，經濟再起飛多一次並唔出奇。上述所有經濟增長奇蹟，背後都有一個寬鬆貨幣政策支持，而現時包括美國，全世界息口甚低至負利率，已有增長條件，如果爭拗有雙方同意嘅解決方法出現，樓市對經濟表現最敏感，升都嚟唔切啦，點會跌九成？
高明
https://www.facebook.com/bigricetea
本欄逢周一刊出
高明
笑到最後 - 高明 舊文
來源 source: http://hk.apple.nextmedia.com