智取大市：整固過後再爆邊
觀乎過去10年嘅恒指周線圖，當MACD線突破訊號線嘅轉強訊號出現後，其後因為震倉而令兩條線差距收窄，但指數上升再帶動MACD線同訊號線差距再擴闊的話，後市多數出現中線升浪，係利好徵兆。目前，恒指就出現呢種現象，加強咗恒指後市有望挑戰22000點嘅預測，唔知會否
估得保守，但見步行步吧，有貨在手，再升再諗。
大市的確有可能橫行整固幾日，但下一浸再爆上的話，升勢會比過去一浸更淩厲，暫時港股算硬淨，因美股跌恒指都跌不多，強勢科網只係溫和調整，手機設備股仲要繼續升。只要市況唔好突然急轉直下，呢批強勢股都難大幅回吐，留意整固完成，邊一日即時轉強就可追入。
以騰訊（700）為例，近期陰陽燭走勢同嚿年3月19日至24日相當近似，重覆嚿年走勢的話，再整固幾日後，有機會出現更淩厲升勢。都係嗰句，更瘋狂升浪似乎醞釀緊，美股破頂就會係催化劑。
強勢板塊未升到龍尾，論手機設備龍尾股，最低迷都肯定係TCL通訊（2618），等到舜宇（2382）呢類龍頭股升到極超買，資金就自然搵酷派（2369）、TCL通訊去追落後，時辰未到，但睇嚟遲早會到。
晉佳
http://www.facebook.com/advanceguy1
晉佳
智取大市 - 晉佳 舊文
來源 source: http://hk.apple.nextmedia.com