炒入摩 要跟貼
2016年06月02日
踏入6月，大市熬上熬落，結果微升收市。最近大市一反傳統淡風，叫做撐得住吓，主要係炒A股入摩同下個月深港通啟動，兩個消息愈傳愈盛，A股入摩傳到有70%機會，呢啲逐步曝光嘅好消息，散戶宜睇住嚟炒。
要留意仲有無政策
呢個星期上證綜指重上2900點樓上，主要係估A股被納入MSCI的條件日趨成熟。申萬宏源就估算，如果成功入摩，初期將為A股帶來990億元至1100億元的資金。本來大家估計入摩機會係一半半，但呢個星期高盛就話，由於中國股票停牌和證券權益擁有人的最新規定及解讀，令A股6月入摩的可能性已經攀升至70%。
至於點解係70%？有內媒解讀入摩本來有三座大山，主要係國際機構投資者擔憂中國市場在投資份額分配、資本流動限制和受益所有權這三大問題上，呢三個問題都係同外資通過境外合格機構投資者(QFII)買A股時遇到的限制。為了解決問題，中國過去數月連番調整政策，基本上已經成功處理咗。但跟住又有兩個新考慮出現，就係A股經常主動停牌同埋境外設立A股相關衍生產品的限制，滬深兩大交易所同步拋出了上市公司停牌復牌新規定，對重大事項的最長停牌時間、停牌行為的監督等作出明確規範。被視為就A股入摩的衝刺。
從中國官方不斷出招催谷入摩機會，結果正式揭盅前唔知仲會唔會有招出，若然有，機會自然再升，A股有可能再升溫，港股都會跟全短炒，所以炒呢個概念要跟得貼，如果深港通開通消息宣佈、境外A股衍生品限制解除，那麼A股被納入MSCI的可能性還將進一步提升。由於外資主要係通過QFII買A股，並主要買大藍籌，例如呢期就掃入白酒股和機場股等。香港有機場股，另外證券股都可能都會受惠。
消息不斷被消化
根據過去經驗，入摩會令國際資金因為重新配置資產推高股市，好似2003年阿布扎比同卡塔爾股市入摩，個市就曾升咗近40%。有內媒估計，一旦A股獲准按5%初始比例納入MSCI新興市場指數，將在2017年6月生效。數據顯示，追蹤MSCI指數的基金公司有5000多家，資金總額高達9.6萬億美元。第一步納入為A股帶來的資金將達到990億元至1100億元；全部納入之後，總的增量資金約為1.67萬億元至1.86萬億元，講到好有期待。內媒講到咁樂觀，呢個世界有無咁易搵嘅錢呢？陸羽仁就寧願當呢啲係短線投機因素，跟住消息不斷被消化嚟炒住先，靠勇之餘仲要識得食胡，好消息兌現就要出貨。
港股跟炒A股入摩，A股昨早升勢凌厲，可惜午後無以為繼，搞到港股升勢斷纜，恒指收報20760點，跌54點；國企指數收報8708，升3點，成交跌番去650億元。
中銀航空租賃(2588) 昨掛牌高開，但跟住回軟收報42元，與上市價持平，中籤者慢啲手都無茶飲。中銀航租成功上市後，市場消息透露國家開發銀行屬下嘅國銀租賃將來港上市聆訊，若順利通過，或會於下周預路演。之前傳佢想集資約78億至117億元，保薦人if1德銀、美銀美林、中信證券國際。
另外，在A股上市的東方證券傳今日上市聆訊，將集資最多117億元，保薦人為花旗、高盛、野村。仲有香港成立的東南亞私營燃氣發電商偉能集團亦已遞交上市申請，計劃於主板上市。國銀同東證呢兩家都算係大企業招股，不過，今年大企上市無乜表現，如果中銀航租招股反應唔錯股價都係咁，呢啲大企上市都有啲難搞喎。
陸羽仁
金融High Tea 舊文
來源 source: http://hdfin.stheadline.com