TVB長陣痛期
2016年06月10日
港股因為端午節假期休市一天。假期前恒指交投回落，在買意不足下，大市終止四連升，恒指收報21297點，跌30點；國企指數收報9027點，漲23點，成交金額563億元。
跟住美股上日開市早段向上，杜指升穿18000點，杜指升66點收報18005
點，相信係受惠美國經濟維持增長，加上息口上升動力暫時唔強，呢排油價持續好轉，美國7月期油再破關升至每桶50.36美元，係去年7月21日以來首次收於50美元上方。能源股成為支撐大市的主要動力，杜瓊斯能源指數升2.1%，
假前港股最養眼係借紐約期油攀升造好的三桶油。中海油(883) 升1.88%造9.75元；中石化(386) 升2.54%造5.65元；中石油(857) 彈2.33%造5.72元，三桶油更搶佔藍籌升幅頭三位；中海油服(2883) 升2.7%造6.86元。
假期前，通訊局公佈，已批准電視廣播(511) 股權結構變動申請。是次申請涉及持有26%電視廣播股權的Young Lion Holdings Limited(YLH)之內部股權變動。在2011年時，「殼王」陳國強、HTC創辦人王雪紅聯同美資基金Providence Equity Partners，透過合資公司Young Lion Holdings Limited入股電視廣播(TVB)26%，成為TVB單一大股東。
黎瑞剛入股唔見四成幾
TVB宣佈，通訊局已批准YLH股權變動，即其中一個股東Providence Equity Partners沽清所持的YLH股份離場，惟無披露作價，而陳國強仍是持有26%TVB股份的YLH公司的最終表決控股人。
消息指，Providence Equity Partners已把股份轉讓予華人文化控股集團董事長黎瑞剛。黎瑞剛買入YLH股份後，保留陳國強作為YLH公司的最終表決控股人，皆因黎瑞剛不是本地人，有關安排只為爭取通訊局通過，如今成功過關。
黎瑞剛係內地媒體教父，確認入股TVB，散戶又係咪跟得過呢？答案未必一定，因為投資有長有短，黎瑞剛接貨係從戰略角度睇，諗住有所作為，同小股東買股做被動投資者好唔同。黎瑞剛在去年四月入股，並無公佈作價，當時TVB股價大約47元，之後炒上49元高位，接着反覆回落，如今得返26元，以黎瑞剛估計入股價47元左右計，如今大跌45%！表面睇都幾傷。
TVB股價由高位回落，家主要靠息率撐住，不過，未來TVB要面對雙重考驗，一係經濟大環境不濟，影響媒體生意；仲有係媒體生態大變，傳統用大氣電波放送的免費電視，唔再處於有利的王者平台位置，觀眾備受網視搶客衝擊。
面對電視生態大變，TVB今年起大膽變革，甚至採用咗近乎先死後生的手法去轉型。家TVB大力催谷機頂盒MYTV Super，有人睇唔通佢條路，擔心大量觀眾走去睇機頂盒，定時定候播放的劇集無人睇，咁同步播放嘅廣告豈不是玩完？呢個情況實際已經逐步出現，所以有人覺得大台狂谷機頂盒係自己食自己的行為。
大台成班聰明腦袋，當然明白呢個壞處，但佢哋同時明白如果被動捱打，雖然可以守住一時，但最後守唔到一世，不如主動出擊，先冒險轉型留住班客喺機頂盒，咁至少可以保住眼球，TVB似乎同收視調查公司講掂數，調查公司將公佈傳統無線廣播加機頂盒的綜合收視率，TVB希望兩個收視率加埋，可以勉強保住市場。
有反彈無大升格局
呢個思維背後，係明白電子媒體市場，將來會變成網上爭霸，TVB如果能夠喺網視打出一片天，咁就唔止香港市場，亦可以係其他市場爭一日長短，家內地氣勢如虹的地區電視台，都係靠網視同植入廣告發圍，大台知道要生存，就要向呢個方向發展。呢個咁大膽嘅轉型方向，當然有拼死一博的冒險成份。
大台決定玩鋪勁，條路睇嚟係要咁走，但成唔成功，中間仲有好多變數，首先我睇過MYTV Super，唔似可以顛覆市場的產品，只是「止血之作」。其次可以肯定的是短期必需投入大量資源，同時仲可能面對收入流失，呢段時間幾長未知。對大股東嚟講，等如上咗船做船長焗住揸船，但對小股東嚟講，上唔上呢隻船就有得揀啦。
正因為係咁，所以強人增持獲電管局確認，TVB股價在公佈後都係做番26元，無升跌，家公司市盈率8.5倍，息率有10厘，如果維持到盈利同派息，咁呢個價就好筍，但市場怕佢未來盈利和派息都可能倒退。結論係在中短期而言，TVB只係有反彈、無大升的股票。
陸羽仁
金融High Tea 舊文
來源 source: http://hdfin.stheadline.com