一路一帶：無牙老虎點戴頭盔
■最近「鄰近經濟強國」因「九段線」問題，曾高調反對國際仲裁法庭嘅裁決。 美聯社
「老師，我唔制呀！點解要迫我坐喺班房角落位喎，又冇人同我傾偈！公平咩？」同學小平同學好委屈咁雙手拍枱，爭未碌地沙。
海牙老師語重心長地向小平解釋：「是咁嘅，老師平時就曬你，畀兩
個座位你用，但你竟然走去霸埋其他同學嘅位，書包放喺走廊，對運動鞋都放喺同學個櫃筒度，仲有啊，你竟然搶埋同學啲茶點嚟食！你有冇咁肚餓呀？」
小平撥一撥佢既金正恩頭，矇住佢嗰對平過海平線嘅雙眼，慢吞吞咁講：「老師，潮流興環保啊，要不是我幫手食埋同學塊餅乾，就過期啦！」
「你咁樣做冇法理基礎，調位嘅事老師決定咗啦，冇得改變！」
「我不接受、不參與、不承認、不執行！」小平激動地講：「呢個位，自古以來….啊唔係！由小一到小六，都係我坐開，點解要突然畀其他人坐？我爸爸是李剛，信唔信我叫佢派個親信入校董會，再話你表現未達標，解除你署任……」老師聽完當堂嚇一跳，然後得啖笑，仲即刻拖住小平入校長室訓話：「小平同學，學校係有校規，規定咗老師要罰學生，無論老師、學生同埋同學，都唔可以向第三者透露詳情，想向校長告我狀？信唔信叫我當奴同拉莉同學坐埋你個位！」
小平過咗幾分鐘，態度「360度」轉變，仲即刻喊曬口：「我都係願意同老師坐低慢慢傾啦，袋住先啦好冇，唔好罰我停課呀，下個月就考試啦，我想畢業呀。」
以上故事純屬影射，如有雷同，實屬不幸啊。最近「鄰近經濟強國」因為「九段線」問題，曾經高調反對作出裁決嘅國際仲裁法庭，民間仲有人話不惜興兵一戰。好多明星即刻自拍放上網，「#中國一點都不能少」hashtag佈滿整個weibo，不過未夠一日咋，中國外交部已經跪低，話肯坐低同菲律賓慢慢傾！其實強國人民嘅心情大家都誤解咗，因為強國人用普通話講嘢，香港傳媒用廣告話報道，翻譯方面可能出現錯誤都唔奇！其實筆者覺得大家都對強國人有誤會啦，民間咁大反應，只係因為怕南海落入其他國家手中，萬一Pokémon Go出咗中國版，其中一個精靈寶可夢訓練中心係「九段線」入面，但家陣判咗唔係中國領土，中國護照去菲律賓要簽證，咁叫啲玩家點去日日鍛練去取勝？
不過有消息指任天堂冇打算將Pokémon Go開中國版本後，玩家根本唔使擔心簽證問題，所以外交部都鬆一口氣，肯拎一支筆一凳，落區慢慢同菲律賓傾囉。
斯郎
https://www.facebook.com/oneroadonebelt/
本欄逢周四刊出
斯郎
~TITLE_S~一路一帶 - 斯郎 2016年7月14日 舊文
來源 source: http://hk.apple.nextmedia.com