派高息旺股價
2016年07月14日
英國政局暫時明朗，英鎊兌美元曾重返1.33關，選出女首相嘅紅利繼續帶動包括港股嘅全球股市，恒指昨日高開，最多升216點，報21441點，升幅維持不久就大幅收窄，恒指收報21322點，漲97點；國企指數收報8909點，上
揚53點，成交金額697億元。內地方面，人民銀行公佈會對13間金融機構開展MLF操作共放水2590億元人民幣，此舉將保持銀行體系有合理充裕嘅流動性。
鷹君豪爽派特息
英鎊反彈帶挈渣打(2888) 收報62.4元，揚4%，匯控(005) 升0.52%，造48.65元；保誠(2378) 漲3.8%，造132.4元；長和(001) 走高1.4%，造85.95元。呢排資金係咁追捧高息股，攞正牌賺幾多派幾多嘅信託基金固然大賣，無論房託同公用信託都屢創新高。
昨日陸羽仁講起話港鐵(066) 咁強勢，同佢派特息有關，有中環茶友就舉多一個例，就係鷹君(041) ，茶友老爸買咗鷹君多年，過去佢經常跑輸其他地產股，但過去半年佢就發威，茶友開頭都唔明，但講完派特別息，咁佢又好似搵到答案嘞。
今年初地產股大插，鷹君跟隨市況最低插過去17.8元，但過去幾個月佢一條氣係咁上，呢排衝破咗一年高位，報收32.25元，累升達81%，點解佢升得咁勁呢？睇番佢每股資產淨值有81.7元，固然大件夾抵食，不過更加重要係佢喺宣佈上年底業績時豪派咗2元特別息，連同末期息0.47元，息率一度高逾10厘。
睇番過去，佢管理層都幾豪爽，周不時會派吓特別息，佢分別喺06年度、08年度、12年度、13年度都派過，即係話10年派過5次，幾乎隔年就執一劑，而且次次都幾和味，最勁嗰次係06年派發咗5元特別中期息，淨係計特別息，都收咗11.2元，如果計埋正常股息就仲襟計。
鷹君做收租為主，點解會有咁多錢派呢？秘訣係佢不斷將旗下物業用信託分拆，包括將寫字樓、酒店拆出來，有時仲會畀股東優先認購番，睇番鷹君大股東都係收水多，有錢就用嚟買番自己公司股票，托吓股價之餘，又顯示自己對公司的信心，所以早前鷹君豪派股息後，有大行就讚管理層呢個做法。美銀美林發表報告指，鷹君年初至今表現跑贏同業，主要由於主席增持等良好因素支持，仲話繼續看好管理層積極的資產交易舉措，可產生的股東回報。
大股輪流炒旺到內險股
茶友老爸喺多年前高價買入鷹君，家先至差不多返到家鄉，但計埋收息就回報都唔錯，可見買股雖然係想賺價，但有無派息都好重要。家佢股價升咗咁多，追入就要留意，但佢股價表現咁標青，可見派高息係對大折讓資產股嘅好處。
陸羽仁先前都講過，好似安全倉(237) 、爪哇(251) 呢類高資產股，如果賣多啲物業要嚟派息，對反映公司價值會有一石二鳥嘅好處。家好多地產股資產豐厚，但股價遠遠落後房託，係咪要諗吓點樣活用資產呢？
除咗好息之徒追逐收益高嘅股份，大市都出現輪流炒。最新數據顯示，內地上半年19家保險資產管理機構，共註冊各類資產管理產品，規模達1034.89億元人民幣。內地保險股借勢炒作，中國太保(2601) 升2.26%，報27.15元，為表現最醒國企指數成份股。中國人壽(2628) 、中國平安(2318) 、新華保險(1336) 都升逾1%。不過，指數升穿咗兩萬一點後，速度開始放緩，唔排除會有回吐，大股水位開始有限，炒家可能會搵到二、三線炒吓。
陸羽仁
金融High Tea 舊文
來源 source: http://hdfin.stheadline.com