財金冒險號：新股中的加州健身
■股市都有類似加州健身的公司，IPO集資時滿紙鴻圖大計，但承諾未必兌現。 資料圖片
連鎖健身中心結業，據報有10萬個會員預繳了近10億元，就此淪為「苦主」。股市都有呢類公司，IPO集資時，滿紙鴻圖大計，但抽完水就係神仙，承諾未必兌現，隨即發盈警亦屢見
不鮮，好比靚女教練氹宅男簽15萬元健身堂，話會親自幫佢拉筋，點知到時啲女教練唔知去曬邊。
更離譜嘅，係上市抽水無耐就落閘，長期停牌，小股東資金凍過水。近年最經典要數諾奇（1353），上市僅半年，主席就夾帶私逃。同樣來自福建嘅米格（1247），上市兩年就延後出業績而停牌至今。
每年近百隻新股，樹大有枯枝，唔係隻隻都呃人，但萬一踩中地雷就元氣大傷，何況新股平均回報不特別吸引。今年截至7月12日掛牌的28隻主板IPO，平均首日升12.7%，累積升30.5%，好似好勁，但通常好嘢分得少，衰嘢就畀曬你，例如累計表現最差嗰三隻，跌33%至43%，中籤率都係百分百。剔除極端表現的新股，睇中位數較合理，首日回報只得4.4%，累計跌0.4%。
港交所（388）李小加話齋，「市場上有老千股，你就不要碰嘛」（講得好啱，但以監管者身份講就好不負責任）。上市多年的老千股臭名遠播，唔碰就唔碰，但新股無往績參考，唔係咁易發現老千，到發現已太遲。一句講曬，新股至少要觀察三年。
笑笑生
mailto:sneeringman@gmail.com
本欄逢周四刊出
笑笑生
財金冒險號 - 笑笑生 舊文
來源 source: http://hk.apple.nextmedia.com