笑到最後：特朗普低息危機
■特朗普表明支持低息政策。 資料圖片
英國脫歐之後，全球以升市嚟慶賀，因為壞消息已過，下一站嘅大型壞消息，全世界都睇美國總統選舉，會唔會選到特朗普；而美國總統大選，將會喺11月舉行，即係話，未來三個月，冇乜真正動搖市場嘅消息出現。
點解咁講？港股過去一年當然
唔算好勁，但起碼冇跌死，最大原因有兩個：第一，危機出現頻率太高，變相令市場覺得冇影響；第二，低息，咩危機最後都覺得救得番，個市跌唔到太深。
先講第一樣，自911之後，市場覺得恐佈襲擊好可怕，但係自從ISIS崛起之後，佢哋將恐佈襲擊「常態化」，基本上每個月都會有恐襲，人命傷亡係好慘，但無情嘅市場見得多會慣咗，最多只會令資金泊去日圓、金銀等。而英國脫歐，原先市場覺得係天跌落嚟，事後都冇乜嘢，即係如果冇嘢嚴重過英國脫歐，個市只會受一般程度嘅影響。
低息就支持住市場，覺得冇事，覺得央行最後會救，所以跌唔到落去嘅原因。始終都係「股神」畢菲特嗰句：「利率就係資產價格嘅地心吸力，低息就係冇地心吸力。」
至於下一個不利因素特朗普，假設佢會贏，事實上美國總統選舉一打一，冇話邊個爆冷。特朗普話支持低息政策，炒唔炒現任聯儲局主席耶倫係其次，維持過去六年狀況先係主調。
低息環境係咩狀態？安逸、假繁榮、現狀良好、強者更強、弱者更弱，同埋最重要係冇乜投資前景，因為聯儲局令大家覺得低息、量化寬鬆係非常手段，大規模投資可免則免，有錢寧願買番啲贏開嘅公司，造就強者越強。美國人比較大膽，都仲有科技創新一絲生路；香港人保守，所以地產霸權會更強大。
印鈔嘅死穴係有朝一日，大家唔再相信貨幣。特朗普如果上任，將低息常態化，即係任期內唔會爆煲，挑戰現金好友耐性。低息令投資市場扭曲，而每次市場出現危機原因同結果都會唔一樣，以前危機係沽資產換貨幣；下次危機，可能係沽貨幣換資產。
高明
http://www.fb.com/bigricetea
本欄逢周一刊出
高明
笑到最後 - 高明 舊文
來源 source: http://hk.apple.nextmedia.com