智取大市 - 晉佳 2016年7月27日
智取大市：又係時候博證券股
■港交所近三星期呈現慢升狀態。 資料圖片
正如之前所述，如果資金由受惠低息放水概念嘅本地地產股、高息股蔓延到其他股，升市肯定係水尾。或許呢個水尾，要有成交配合，搞到乜都升到見頂，而星期二除咗科網股升唔起之外，追落後股去到濠賭股，好快應該去到更落後股，似啦似啦。
通常呢個時候，小弟會望一望港交所（388）以至一眾本地證券股。其中，港交所近三星期呈現慢升狀態，英國脫歐到𠵱家只升6%左右；至於脫歐後冇升過嘅國泰君安（1788），噚日升半成，估計仍有多一棍；再落後啲，都係耀才（1428），一嚟公投後冇乜升過，二嚟連續兩個星期守喺保歷加通道中軸，升市未完好難跌得落，有勝算；另一隻選擇係剛剛宣佈獲洽購控股權嘅時富金融（510）。
時富金融之前公佈，洽售股權畀「新恒基」，後者做物業管理，主要客戶有解放軍、中聯辦，如果收購時富金融，最直接嘅諗法，會唔會係幫中聯辦買股票呢？最緊要有概念，自然有捧場客。時富金融公佈單刁之前，曾有大陽燭挾上然後停牌，復牌後股價下跌，前收市價距離開車前0.35元高13%，呢個價理論上唔會停留太耐，趁證券股可追落後，時富金融仲有睇頭。
晉佳
http://www.fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.apple.nextmedia.com