Money Walker：
放水Chok市無限Loop
■日本等多國央行話放水，令個市反彈；之後又冇實際行動個市又再散皮，全球就喺呢個循環裏面不停loop。 資料圖片
有冇發覺各國央行同全球股市似乎正陷入一個無限loop嘅循環？
首先，股市升市加上數據對辦，聯儲局考
慮加息，其他主要央行亦冇意欲加碼放水。之後，美國加息預期升溫，連同其他央行放水預期大減，一同震散股市。再跟住，市場恐慌迫使儲局按兵不動，其他主要央行亦要急急放風話考慮減息或加碼寬鬆，最終刺激環球股市反彈。
隔咗一段時間之後，以上一切又再輪迴過。股市好轉加上數據OK，儲局又重新考慮加息，而其他央行口裏說要放水，身體卻冇鬱過，於是股市再度散皮，搞到央行又要出口術維持加息及放水預期。歷史就如是者不斷重複，無限回帶。
最近喺放水憧憬刺激下，金融市場氣氛勁樂觀，歐美日央行自然唔會咁快真正出手。但倘若未來一、兩次議息會議，各國央行都繼續齋噏，試問英國脫歐所觸發嘅放水憧憬仲可以玩到幾耐？
提提大家，美國加息預期已經靜雞雞升溫番，如果8月初出爐嘅非農就業數據表現強勁，12月加息嘅預期肯定會進一步撻著。不過筆者相信今年內都未必真正可以加到息，因為個市一驚儲局就會褪軚。
環球金融市場嘅嘢你未必會關心，但自己份MPF你就多多少少都會望嚇。年初至今嘅MPF贏家非環球債券基金同亞洲股票基金莫屬，不過打工仔要有心理準備，美國加息預期升溫會短暫不利上述兩類MPF表現。要鎖定利潤，可趁𠵱家債價同亞股仲未大跌，將之前嘅供款連同累積回報，轉入性質如同揸cash嘅貨幣市場基金。
El.
http://fb.com/moneywalkerhk
本欄逢周三刊出
El.
Money Walker - El. 舊文
來源 source: http://hk.apple.nextmedia.com