收市閒情：捉精靈定係撞邪？
■如果你今日試嚇抬起頭，藍色天空下，出現嘅唔係噴火龍，而係一條被大家違忘嘅「雙彩虹」。 朋友冼柏橋提供
我係James，自從小精靈佔領香港後，我覺得香港人，一定係撞邪。
喺Office睇睇嚇報價機，突然有同事大叫：「呀呀呀！」真係嚇到個心都離一離，即睇多
次個指數，又冇嘢呀，之後就明。同事繼續叫，「有隻傻鴨呀」。之後就所有人9秒9拎起手機，係咁掃係咁掃，唔講以為公司妖孽眾多，要羅庚去捉妖！嗰種速度，以前只會係大家收到莊家報料要掃貨時出現。𠵱家？大家竟然將呢種神技，唔係應用喺搵錢，而係搵小精靈！天呀！咩料？
公司都算，行出街先震撼！如果精靈可以進化，相信香港人已進化做低頭族2.0。以前都係玩嚇WhatsApp、上嚇facebook，都唔算阻街。𠵱家係行行嚇，前面個人係突然定咗！係好似俾鬼上身咁煞停！如果突然急停嘅係一個美女，我撞上去都話可以叫做一個浪漫邂逅劇情，但好多時都係你一望之下，揹背囊，戴Cap帽，真係以為自己係小智呀？即係咁，你揸車壞車都要打死火燈，唔打燈學咩人煞車？
最恐怖係，公司班女同事，明明就天生以為自己係公主，行多兩步都叫救命。點知今日收工時，竟然有幾個話，「我哋今日一齊坐巴士？」「你哋明明唔順路㗎」。「巴士易啲捉精靈呀！」你哋仲唔係撞邪？如果我有紅筷子，我一定挾佢哋中指「出嚟呀！出嚟呀！我知呢個唔係你嚟㗎！」
好啦，真係去到巴士站，十個有九個都當自己係小智。「呀！有隻比卡超呀！」嗰一刻，手執工事包，唔係拎精靈球嘅我，好似跌入一個唔屬於自已嘅世界。令我諗起村上春樹《1Q84》兩個月亮，望住同一個巴士站，人哋望到嘅，係一隻比卡超，而我，睇到嘅真係一個巴士站。睇到人哋睇唔到嘅嘢，除咗撞嘢？仲會係咩嘢？
撞邪會令你睇到唔應該睇到嘅嘢，同時令你睇唔到真實嘅世界。手機入面世界可能好開心，不過如果你今日試嚇抬起頭，望嚇天，藍色天空下，出現嘅唔係噴火龍，而係一條被大家違忘嘅「雙彩虹」。
千頌C
http://www.fb.com/winbigwok
本欄逢周三刊出
千頌C
收市閒情 - 千頌C 舊文
來源 source: http://hk.apple.nextmedia.com