魚樂無窮：深港通一個結論
■深港通出籠，相關概念股卻大跌，反映散戶學會好消息出貨。 資料圖片
深港通終於出籠，但熱炒股如港交所（388）、中港券商股、大折讓H股全部見光死，跌到反艇，結論只得一個︰戰友越來越成熟！
不是嗎？以往炒滬港通、炒減息諸如此類振奮消息，受惠股總會裂口高開再插水
，點都仲有水位走。噚日呢？用港交所做例子，裂口低開然後再隊，全世界鬥快食糊下，差不多乜位買都輸，證明散戶做得多大閘蟹，終於學會好消息出貨呢條金科玉律。從另一個角度出發，連僅有嘅低手都變成中高手，你話搵食有幾咁艱難。
上日推介協鑫新能源（451），兩日累升兩成，今日再接再厲，向冷門股惠生（1340）埋手，賣點兩大個︰第一，股東連環減持，持股降至不足三成，絕對控權都唔要，有乜搞作？自己諗諗！
客觀事實係，惠生市值4億唔夠，又係大低水殼股一隻，仲要有錢賺有息派，抵食夾大件之選！第二，股東減持作價分別為0.7及0.78元，昨收報0.67元，現價入場平過接貨者一大截，連頭盔都供應埋，威番次其實唔難。近日股價由低位逐級回升，聰明錢似乎已率先入場，只要一聲令下party即刻開始，你準備好未？
唐牛
http://www.fb.com/tongcow88
本欄逢周二、四刊出
唐牛
魚樂無窮 - 唐牛 舊文
來源 source: http://hk.apple.nextmedia.com