食胡情切
2016年08月18日
深港通亮綠燈，但金融證券板塊已見食胡風，股價紛紛回落。主角港交所(388) 股價喺好消息證實後即回，既是反高潮，但都係預期之內。恒生指數昨日高開85點報22995點，升幅擴至119點，高見23029點，開已開得唔勁，全日多數時間橫行微升，走勢最肉酸
的地方係三點內地收市後，港股即插，最終挨近全日低位22775點收市，恒指收報22799點，跌111點，成交金額847億元。內地股市昨日接近無升跌，但港股在內地收市後急回，顯示本地購買力不足。
港交所由頭衰到尾
港交所(388) 被投資者趁好消息出貨，一開都唔掂。佢在周二偷步炒上203元高位，收200.6元，你話無春江鴨我就唔信啦，隨時知情者在周二已推高出貨。到周二收市後公佈深港通開通，港交所昨日一開已回到198元，開市已經唔見咗1.3%。
經紀張話佢有啲客炒深港通揸咗港交所，見佢開市已經跌，話「無理由係咁」，嫌賺得少唔沽，咁就中招啦，隻嘢愈跌愈有，三點後跌多一浸，收挫4.7%造191.2元。我話短炒在好消息公佈後翌日一開市，已是最佳沽貨時機，唔好鬥氣，手快有，手慢無，唔走隨時由賺變蝕。
經紀張問我港交所後市點睇，我話首先睇大市跌得未，再睇個股因素，若論後者，好消息炒完，短期唔似有大好消息，正路要反覆尋吓底。
證券股也遭拋售，華泰證券(6886) 跌2%造17.9元；海通證券(6837) 跌3.3%造13.88元；中信證券(6030) 挫4.3%造18.12元，為表現最差國企指數成份股；銀河(6881) 挫2.6%造7.6元；廣發(1776) 跌3.8%造17.68元。
二、三線券商股跌得更傷。國泰君安(1788) 插9.52%造2.85元；申萬宏源(218) 瀉7.19%造4.13元；耀才(1428) 挫7.2%造2.45元；海通國際(665) 插7.3%造5.09元；第一上海(227) 挫7.4%造1.37元。抽得急，回得快，亦很正常。
早前熱炒的深港通AH折讓股回落，新華製藥(719) 挫8.7%造5.68元；山東墨龍(568) 降9.8%造3.4元；海信科龍(921) 挫4.66%造5.52元；浙江世寶(1057) 插10.7%造10.38元。
港交所呢期慢慢炒上嚟，然後抽高到203元高位，走勢算不俗，其他證劵股仲短癮，呢樣都反應咗市埸資金有限，熱錢短炒都流向大價優質藍籌，三、四線股只係食水尾。
唔食胡教訓太深
睇番大環境，無論港交所抑或係券商，都係睇大市交投食飯。今年大市成交奀奀，無論中港股市交投量都只得去年六、七成，呢樣指標透明度好高，所以無論消息點好，如果谷唔起生意額就無乜實惠。當市場情緒好時，大家仲可以炒憧憬，O依家個市唔係咁熱，大家變得務實咗，變成好消息就係食胡時！
講起港交所「被食胡」，有中環茶友坦言，唔好笑大家心急套利落袋，O依家仲留喺個市嘅都係老兵，睇過唔少「有胡唔食罪大惡極」的古仔。佢舉滬港通為例，去年炒到開巷，自己跟紅頂白，買咗兩隻當炒股，一隻係做基金嘅惠理(806) 、一隻係國壽(2628) 。兩股都係炒A股概念，一隻大陸味重啲，一隻香港味重啲，不過兩者都咁火熱，炒到佢都如癡如醉，尤其去到舊年5、6月，惠理大股東頻出來唱好，隻股熱度更高，直至大股東喺高位配股，茶友開始有的警覺，連老行尊都有實際行動食住先，自己係咪應該跳車呢？佢稍一猶豫，就已經錯過最高位出貨機會。雖然係咁，好彩佢都跟住減磅，最後賣淨一啲國壽坐咗艇。
券商股業績有排未得
茶友話，睇番呢12個月表現，惠理最高報9.73元、最低5.84元，昨日收市7.36元，已較高位大幅回落，O依家惠理業績亦滑落，上半年純利按年大跌98.9%，僅501.7萬元，每股盈利0.003元，要再次有亮麗表現，恐怕要等到下一期牛市先得。證券股業績有排未得，如果當日唔係雙辣變一番都食住先，今日仲邊可以咁風騷歎茶話當年？
陸羽仁
金融High Tea 舊文
來源 source: http://hdfin.stheadline.com