中環在線：
富豪開餐 保鑣護送傳菜
■福臨門酒家 
8月放暑假，講個輕鬆話題，又畀大家估估嚇，估中冇獎！大家都知道富豪畀得起錢，對於飲食當然好有要求，除咗食物質素之外，個別富豪食飯時仲有啲特別習慣。
好似城中一名有紅顏知己嘅富豪（
唔係超人），佢去到邊度都有保鑣跟身，基本上，如果你去佢鍾意去嗰幾間餐廳，門口已經見到有保鑣，都可以估到佢喺度食緊飯。
聞說，保鑣除咗保護佢人身安全，亦要睇實佢啲餸，有人見過佢嘅保鑣企定喺廚房門口，「護送」侍應傳菜到佢間貴賓房，確保運送過程途中冇任何意外發生，查實都算係保護佢人身安全嘅一種嘅。至於保鑣要唔要拎埋支銀針出嚟檢查，或者要唔要以身犯險試食先，咁就唔知道嘞。
福臨門常客要專人換碟
另一位鍾意幫襯灣仔福臨門嘅富豪，佢指定要用貴賓房之外，亦似乎相當注意整齊衞生。華華有次喺福臨門見到佢同朋友食晏，有兩名OL打扮、外表普通嘅女子跟身，原先以為佢哋一齊食晏傾生意，點知呢兩名女子大部份時間都係企喺貴賓房門口。
佢哋好忙呀，最主要嘅工作就係幫房入面嘅人更換碗碟，仲換得相當頻密，到時到候又要催嚇侍應傳菜，真係好唔得閒，估計佢哋陪老闆食晏之前，要食定麥記打底先掂。所以話呢，幫有要求嘅富豪打工，唔係人人都做得到㗎。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com