中環在線：
嶽少新餐廳 二星大廚主打地中海菜
■Operetta係由米芝蓮二星大廚小西充（圓圖）任廚藝總監。 
喺金鐘太古廣場開業超過27年嘅美式餐廳Dan Ryan"s Chicago Grill今年4月結業，讓大家惋惜咗幾個月
，新租客Operetta上星期四已經悄悄開業，呢間主打地中海菜嘅新餐廳由米芝蓮二星大廚小西充擔任廚藝總監。
小西充嘅日本人身份好易令人混淆佢嘅專長，其實佢最早喺意大利餐廳做廚，之後去到法國學廚兼工作7年，4年前「飲食大亨」林建嶽想搵日本大廚負責一間法國餐廳，透過朋友認識小西充，兩人一拍即合，連續兩年摘星嘅Wagyu Takumi就係小西充主理。
人均消費$300至$500
嶽少計劃擴展飲食王國，又搵小西充負責太古廣場嘅新餐廳，貪佢懂得烹調香港人口味嘅歐陸菜。小西充坦言，香港人喜歡嘅歐陸菜，味道淡少少，奶油比例要放輕，並注重季節性新鮮食材。
咁嶽少有冇落order要求佢為新餐廳摘星呢？小西充當然話冇喇。佢強調，根本唔知道米芝蓮專員係何方神聖，有時遇到對食物特別感興趣嘅顧客，佢會懷疑對方係咪米芝蓮專員，但始終無法求證。
講到價錢，呢度人均消費300至500元，Pizza、Tapas、意大利粉、海鮮各適其適。說到底，有時「平靚正」當然好，但都要接受部份餐廳係一分錢一分貨，包括要尊重廚師嘅手藝。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com