笑到最後：
香港陷日本化危機
■從Grand Yoho熱賣就睇得出香港陷入日本化嘅危機。 資料圖片
新盤Grand Yoho熱賣，首三日超購29倍，有望成今年票王。但係搶樓背後，就睇得出香港陷入日本化嘅危機，似乎會步後塵迷失十幾廿年。
記得高明啱啱畢業嗰陣，係未有量化寬鬆嘅舊世界，有
朋友入銀行做，咁啱sell到個日本客，就同高明講：「日本人好得意，有少少息都執到寶咁」，佢話，因為日本零息咗好多年，有少少息已經好開心。
日本化特徵一，就係有少少息當係寶。今年英國公投脫歐大家先突然醒覺，原來央行印開銀紙就會上癮，低息環境會持續多於完結，全球都行日本舊路，啲人見有少少息就衝入去。先唔講Grand Yoho係咪用嚟抵抗濫印鈔票嘅優質資產，入票，其實都只係抵抗央行嘅舉動。
特徵二，活在當下。有份正職嘅打工仔，人工冇乜得加，當下處境生活、搵兩餐冇問題，但做邊行都好似冇乜前景，除咗論資排輩升上去，冇乜爆炸性發展，而當你以為升職升到咁上下，你嗰行又好似就嚟被淘汰，無論做啲乜，都係苟延殘喘。
特徵三，職場流動性減低。當機構覺得前景差，唔會有太大動作去增加投資。喺大公司打工，公司未必會隨便炒人，但係離咗職冇咁易有人請番，隨時職位都削埋，個個都坐定定好官僚咁做，非金錢嘅後果係，呢啲環境打工仔會受多啲氣，因為冇咁易講「東家唔打打西家」。
香港情況雖然似日本，但有一樣好過日本少少，就係樓價會因為低息而升，反而日本就咁多年都冇乜起色，水泡都冇得賣。喺香港，有資產會相對較舒服，冇資產就被貨幣貶值陰乾。亦都解釋咗過去一年樓市調整但跌唔落，唔係因為經濟太好，只係因為「貨幣淡友」太多。
日本零利率咁多年冇成效，唔係加息，而係順手QQE埋，各國央行睇嚟都會重覆呢段歷史，連美國都唔會例外，好彩嘅係日本化，都叫可以搵兩餐，唔好彩就會好似津巴布韋咁，拎一大疊銀紙買少少嘢。睇見沙田第一城上車盤都過千萬元成交，乜資產都冇喺手，的確係提心吊膽，搶買Grand Yoho，當水泡咁買，其實好合理。
高明
http://www.fb.com/bigricetea
本欄逢周一刊出
高明
笑到最後 - 高明 舊文
來源 source: http://hk.apple.nextmedia.com