中環在線：
張華峰華麗轉身 反對上市改革
■噚日張華峰發信畀證監會行政總裁歐達禮，要求擱置諮詢。 資料圖片
金融服務界立法會功能組別選舉今屆有3名候選人，其中一個業界重點議題，就係聯交所、證監會諮詢市場，建議改革審批新股嘅架構。現任議員、尋求連任嘅張華峰成日畀對手批評，臨選先嚟轉軚
箍票，佢噚日仲出埋信，白紙黑字證明自己雖然大隻，華麗轉身都頗靈活！
呢個諮詢早在6月份出爐，當時都未開始選舉提名，初期張華峰認同新制度更有效改善效率。但隨住徐聯安、詹劍崙出面競選，又開足火力攻擊，講到張華峰好似吳三桂咁，出賣業界利益，佢卒之解畫，「我唔係轉軚，係危機管理！」
盼政府不幹預市場
噚日佢發信畀證監會行政總裁歐達禮（Ashley Alder），要求擱置諮詢，切勿硬闖，事關業界有好多疑問，佢更加要求政府恪守過往盡量不幹預市場嘅做法。不過咁，張華峰多次強調其議員任期到9月底，所以仍然係現任，咁點解封信用候選人身份署名嘅？
諮詢都仲有一個月期限，各方表達意見好應該。但留意番，歐達禮唔識中文，張華峰係咪應該加番份英文版呢？聽聞證監會都係收到份中文版咋，萬一有咩微言大義Lost in translation，咁就論盡啦。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com