造衫造出彩虹
2016年08月23日
巴西里約熱內盧奧運落幕，今屆俄羅斯大批運動員被禁參賽，結果益左美國同英國，兩兄弟分別取得金牌榜冠、亞軍席位，中國今年得第三，成績只係中規中矩，有人形容似中國經濟進入調整期，好彩中國女排打出爭氣波，挽回左唔少分數。
至於下屆主辦國日本，今屆表現
都係麻麻，同樣無法超越美英，估計到下屆才發力。
今屆里奧在媒體上表現慢熱，電視廣播(511) 取得轉播權，好有機會做左蝕本生意。不過佢出錢出力播奧運，的確益左唔少市民可以免費又方便咁欣賞到精采賽事；同一時間佢亦借呢樣嘢宣傳佢嘅機頂盒，支出有部份可以當做宣傳費。現時電視生意唔易做，樣樣一味縮亦唔係辦法，揼本搞奧運至少可贏番口碑。
大台轉播奧運贏口碑
巴西為了搞今次盛事用左唔少人力物力，但始終弱國係蝕底啲，特別係傳媒效應。今年股市炒奧運概念都唔濃烈，之前無乜氣氛，到昨日結束，先見到隻李寧(2331) 彈上一年新高5.09元，但收市回番落4.91元，只升0.2%。
李寧早幾年因為過度擴張，陷入財政危機。經過一段時間休養生息，開始進入康復期。早前公佈上半年業績由虧轉盈，獲幾家大行包括瑞信同高盛看好。高盛估佢受惠產品重新定位，加上庫存管理好轉及成本控制推動下，相信業績改善會持續。係大行推介下，過去幾個月佢股價冉冉上升，唔覺已經升近大行目標價5.3元，後市仲有無力再上，就要睇大行係咪會上調佢嘅目標價嘞。
講開運動概念，昨日申洲國際(2313) 公佈業績，中期純利為14.5億元人民幣，按年升29.41%；每股盈利1.04元人民幣，放榜後股價抽升逾9%，收報47.7元。睇番期內佢做69.52億元人民幣生意，按年升24.6%；毛利率上升2.5個百分點，高達31.9%，真係幾犀利。管理層解釋，盈利表現好係受惠於生產效率有效提升、人民幣對美元匯率貶值，以及產品結構持續改善帶動。
申洲谷運動服有收成
申洲一向被視為成衣紡織股，由於美國百貨業麻麻，股價一度調整，但管理層透露現時有63%產品係運動相關，而且大力發展新衣料，迎合市場趨勢。
佢過去兩年股價基本上係反覆上升，申洲市值現時去到665億元，預期嘅市盈率都去到17、18倍，估值一啲都唔平，可以話做傳統行業必定要做大做強，能夠咁就舊經濟都可以做出彩虹。
港股昨日無乜主題，大市一度借人仔匯價回軟插低，但下午慢慢收復失地。
雖然A股走軟，但恒指收報22997點，反升60點；國企指數收報9602，微跌3點，成交695億元。藍籌股滙控(005) 表現較佳，升0.46%至55.15元。有出色表現嘅多數係佳績股，除咗申洲，中國高速傳動(658) 半年純利升近10%，加上獲瑞信續唱好，股價抽升10.94%至7.3元；中升(881) 上半年純利大升97.48%，股價昨漲13.42%至6.17元；金山軟件(3888) 獲野村與中金升目標價，股價亦彈6.81%至16元。
收市後中國海外(688) 派上半年成績表，純利增加20.6%，每股盈利2元，扣除投資物業公允值的淨利潤升15.8%，中期股息增75%至35仙。
公司上半年合約銷售升11.5%至952.6億元，銷售面積601萬平方米，考慮市場變化及中信地產收購的影響，上調今年銷售目標至2100億元，初步睇佢業績都算對辦，最實惠就係派息有增加。
陸羽仁
金融High Tea 舊文
來源 source: http://hdfin.stheadline.com