金手指：無謂承諾最多人信
■日本「振興經濟」嘅方案，只係得個講字，但永遠交唔到貨。 資料圖片
香港有兩個近乎喬布斯級嘅visionary，能預見消費者要啲乜。佢哋嘅名？有如本報幾日前報道，叫趙公允、趙公亮。佢哋同喬布斯唯一分別，就係交唔到貨。先有「盛女」Bonnie最早警告我（但冇通知
聲財爺曾俊華）嘅咖啡機，到早排嘅手機充電「磁能線」。
講真，踏入選舉期，「趙氏兄弟」式承諾滿天飛。就算落筆呢刻身在東京嘅孫柏文，相信喺周末東京都知事選舉都有。我諗好似我咁，叫隧道加價即時解決隧道塞車嘅人，喺全世界都係冇市場，而啲「趙氏兄弟」式嘅承諾就真係長講長有，永遠交唔到貨，不過永遠仲有人信。
多唔好講，齋睇日本。佢哋早排繼「直昇機克」伯南克強勢探訪日央行後，就全球勁吹風話佢哋印鈔畀日政府使。點知包括我在內，沽定日圓嘅人，俾嗰個最後宣佈「得」2,000幾億美元嘅政府使錢「振興」方案震到個沽倉散咗。
東京都好啲，幾年前我去南部福岡，嗰度起咗好多新嘢，例如球場、政府大樓、公路、公廁、公園等。冇錯，清一色政府嘢。私人地方，由商場到酒店，私樓到商廈，都係有如個「時間囊」咁，1990年後冇變過。仲要你感覺到硬件冇變，營運「軟件」越搞越cheap，冇budget。「趙氏兄弟」式嘅「振興」方案，廿幾年後都仲咁多人信，真係日本版的「磁能線」。
孫柏文
獨立股評人
http://www.fb.com/shuen
本欄逢周二刊出
孫柏文
金手指 - 孫柏文 舊文
來源 source: http://hk.apple.nextmedia.com