賣盤風 吹呀吹
2016年08月02日
港股七月尾調整幾日，八月開步先嚟個升市，叫做一個好開始。
呢排工業股表現唔錯，但原因唔同，好似瑞聲(2018) 同舜宇(2382) 係炒它們的製造業食正科網潮，但亦有個別地產股就炒資產。過去兩個星期，專做積層板同銅板嘅建
滔化工(148) 同建滔積層板(1888) 就雙雙爆上，主要係公司做地產進入收成期，名下廠房價值獲睇好。
建滔做工業做得唔錯，但幾年前老闆張國榮開始加大力度做地產，喺青黃不接股價一度下滑，但呢期佢又發威。摩根大通就指出，建滔化工早前發盈喜，料中期純利增加不少於70%，集團資產負債表強勁，及一旦旗下物業單位工程完成，交付予客戶後，料物業銷售收益急增，上調2016至17年盈測56%及2%，目標價由17元升至20元，維持評級「增持」。
建滔化工賣樓當甜品
該行認為建滔化工禾桿冚珍珠，指集團的內地房地產業務價值似乎被低估，建滔化工擁有具規模逾300億元的投資及物業發展組合，或超出整個集團的價值。更重要的是，集團擁有逾60個廠房，包括層壓板、印刷線路板及化學品，佔整體EBIT 70%至80%。
摩通維持集團核心業務層壓板盈利預測，相信該業務可穩健發展及具盈利能力，並料印刷路板及化學品大致收支平衡，照佢咁講，佢本業都OK，地產業務就成為附送嘅甜品嘞。
港股急升，當然唔可以靠工業股啦，市場傳上升和採購經理指數有關，官方7月採購經理指數(PMI)雖然只得49.9低於預期，但非官方的財新中國製造業採購經理人指數(PMI)顯示，7月錄得50.6，比6月大升2個百分點，顯示製造業運行恢復增長，這是2015年2月以來首次錄得增長。
昨日輪到中資股叻叻，尤其係內銀股普遍向好，建行(939) 飆升2.9%，收報5.35元；中國銀行(3988) 上漲2.2%工行(1398) 升1.8%，收報4.47元；內險股中國平安(2318) 揚2.4%，收報37.05元。喺中資股推動下，恒指最多升過369點，收報22129點，急升237點；國企指數收報9129點，上揚170點；紅籌指數收報3768點，漲54點，成交金額634億元。睇嚟8月如果要再上，都要靠中資發力至得。
依波路易主無全購
生意淡泊，不如賣殼。又有間市值六億零嘅公司控制權易手。依波路(1856) 公佈，由主席蘇大同意以1.548億元向Top One Global出售6800萬股，出售事項已於7月29日完成。
交易完成後，主要股東在依波路持股由20.74%降至0.94%，不再成為主要股東，Top One Global持股則達19.8%，並成為公司主要股東。由於今次售股只係涉及兩成股權，新買家唔需要全購，小股東唯有希望新老闆喺交易完成後有一番炒作，自己有機會繼大股東後甩身。
依波路在2014年上市，當時內地已開始大力打貪，名牌銷售頹勢漸露，公司可以話係趕搭到尾班車上市，否則都幾難掛到牌。上市後佢一度炒過，但隨着本地零售不斷插水，股價由6.32元高位回落，現價1.91元。
上個財政年底，公司轉盈為虧，正行生意難做，大股東出售股權收番筆，都係「依波路」的做法。
另一隻世界華文媒體(685) 以逾兩成溢價售旗下做《明報周刊》的萬華媒體(426) ，世界華文午後復牌一度狂升1.07倍，惟尾市升幅大縮，收造1.38元，只升14%，由於成日成交只有129萬元咁少，開市抽高只係傻瓜盤，講唔上做咗乜嘢局。
世界華文按每股1.7016元，悉售萬華媒體2.927億股予國企青島西海岸控股(國際)，大家都估世界華文只係賣殼，唔係真係賣《明報周刊》，但世界華文出售萬華預期可獲出售收益3.633億元，在償還為數約2.5億元銀行及其他借貸後，按實際年利率4.58厘計算，料每年可節省利息約1145萬元，市場可能仲炒吓佢會派特別息。
不過，對世界華文嚟講，一年慳千幾萬影響唔到一成利潤，點可以支持股價大升呢？所以高位追貨者好可能接咗火棒啦。
陸羽仁
金融High Tea 舊文
來源 source: http://hdfin.stheadline.com