魚樂無窮：三個煞食催化劑
■九巴母公司載通有三個催化劑，股價炒上無難度。 資料圖片
要股價向上，炒作催化劑不可少，卻又是可遇不可求。有一個催化劑，已經好開心，打孖上？直頭要開香檳！三個一齊嚟？邊有咁筍嘅股？有！今日推介嘅載通（062），一次過畀曬三個概念你。
概念一︰高息誘惑。載通乃典
型高息股，過去十多年交足功課，中期及末期皆有向股東派息，金額絕對唔係敷衍了事，用現價計，股息率超過5厘，當見到領展（823）喪炒至唔夠4厘股息，你就會明白載通可愛之處。
概念二︰油價熊市。國際油價經過早前一輪急彈，5月再由高位回落，幅度更超過兩成，正式步入技術性熊市。載通主營九巴業務，業績與油價可謂息息相關。睇睇舊年業績，受惠油價大跌，全年盈利爆升五成，大有立竿見影之效。今次油價跌浪，載通股價仍無寸退，大落後也。
概念三︰精靈熱爆。《Pokémon GO》在港推出後大熱，大家日以繼夜捉精靈，玩到廢寢忘餐。其中一個舒適又有效率嘅方法，就係坐住九巴慢慢捉，九巴facebook更為訓練員精選多條路線，夠貼心！從概念到實際生意，都帶來正面影響，值得真金白銀支持！
唐牛
http://www.fb.com/tongcow88
本欄逢周二、四刊出
唐牛
魚樂無窮 - 唐牛 舊文
來源 source: http://hk.apple.nextmedia.com