深圳發過香港
2016年08月31日
內地再傳出深港通喺十一月開通消息，加上美股造好，帶動港股再衝兩萬三千點。
中國證監會國際合作部主任祁斌今早與港澳媒體就「深港通」進行交流，現場資料顯示深港通工作大致時間表，11月中下旬深港通預計可以開通，於是相關概念股就炒作吓。
講起深港
通啟動有期，中環茶友話，兩地開通好似搭通咗水喉，表面睇係兩家得益，但邊家得益大、邊家得益少就難講，就要睇邊個做得好。茶友坦言，佢就睇好深圳會跑贏香港嘞。
股市長遠反映經濟
茶友有此一說，皆因佢話最近上過深圳，發覺佢哋嘅創科搞得真係好。之前深圳已經出咗兩間巨企騰訊(700) 同華為，佢哋唔單止被喻為中國實力最強嘅大企業，而且仲係世界級。華為創辦人當年為咗搞好公司，將九成八嘅股權派畀員工，O依家華為員工好多千萬，以至億萬嘅富翁，香港嘅航空公司都做咗唔少佢哋頭等嘅生意。深圳喺創科發展已經拋離香港，O依家佢經濟總量已超越香港，未來只會愈拋愈遠。股市係為經濟服務，兩地搭通水喉，邊個競爭力強啲可想而知。
深圳前景畀到人信心，同樣喺地價反映，深圳啱啱就出咗塊三百幾億嘅商業地王，可見內地資金對其前景嘅信心。
深圳市道高溫不散，係當地最大地主嘅深圳控股(604) 公佈中期業績，股東應佔純利同比升68%，深圳控股(604) 公佈截至6月底止中期業績，純利16.55億元，按年升68.04%；每股盈利22.41仙；而且仲派中期息7仙，上年同期派3仙。首席營運官朱國強透露，集團持續退出三、四線非核心區城市業務，會與政府商討退還未發展土地，並積極推售剩餘物業，集中精力喺深圳。佢話集團與國企深圳廣電合作，發展福田，南山，羅湖，龍華等地皮，目前正進行前期籌劃，未有具體數字，然而因成本低，位置好，相信未來回報可觀。
睇住iPhone 7面世食胡
睇番深控股價，佢喺去年A股牛市表現唔錯，同時仲趁機集過資，今年佢走勢受惠於當地樓市好轉，比其他內房股強，樓價亦跑贏咗香港，呢個係唔係啟示咗深港互通，邊個會係贏家多啲呢？
喺深港通消息下，兩地差價股被炒起。浙江世寶(1057) 揚7.4%，造10.7元；山東墨龍(568) 飆6.6%，造3.38元；新華製藥(719) 升4.6%，造5.93元；晨鳴紙業(1812) 升5.5%，造6.9元。至於恒生指數高開124點報22945點，午後升幅一度擴至252點，高見23073點，尾市升勢放緩，恒指收報23016點，上升194點；國企指數收報9597點，漲99點，成交金額609億元。
滙控(005) 、騰訊(700) 及友邦(1299) 為升市火車頭，合力推動恒指85點升幅。滙控升0.99%，造56.2元；騰訊走高1.69%，造204.8元；友邦漲1.25%，造48.8元。蘋果發佈會於9月7日，市場料推iPhone 7呼聲高，令下周一染藍的瑞聲(2018) 再創上市高位，最高見過90.45元，升4.7%，收造89.5元，升3.6%；舜宇(2382) 也創上市新高，曾見42.5元，收造42.35元，升4.8%，隨住蘋果新機面世，佢哋升咗唔少，都要開始留意好消息會唔會引發食胡回吐嘞。
收市後中銀香港(2388) 公佈截至6月底止中期業績，純利427.3億元，按年增加219%，派中期息54.5仙及特別息71仙，該股收報26.1元，升0.15元。
年初時中銀香港股價曾隨大市插穿20元，比高位跌近4成，當時真係入貨等收特別息嘅最佳入貨時機。
陸羽仁
金融High Tea 舊文
來源 source: http://hdfin.stheadline.com