經濟客艙：儲局加息怕甚麼
■市場對儲局加息憂慮重燃。 資料圖片
如果聯儲局今年內再加息，未必係因為美國經濟好；反而可能係為咗經濟有機會衰退而做準備，有咩風吹草動，儲局都可以掉頭減息撐經濟。
傳統智慧話美國大選年美股造好，今年未必應驗，而且對美國經濟產生漣漪反應較以
往大。美國全國商業聯會最新調查發現，超過一成僱主延後投資或招聘計劃，想喺11月總統大選結果出爐後再作打算。另有過半數僱主認為，今年美國總統大選對經濟有負面影響。
上星期五儲局官員講話撐加息，美股急跌近400點、國債孳息率抽升、大宗商品價格齊跌、VIX恐慌指數急彈四成，市場對美國加息憂慮又重燃。一直大放開水喉嘅央媽，意識到放水唔等同救經濟。國債孳息回升，尤其德國10年期國債重返正利率區間，唔可以睇輕。
負利率時代，資金追尋回報，息價越跌越買嘅接火棒遊戲，變為亡命俄羅斯輪盤。記得去年4月到6月，德國國債孳息飆升90點子，差唔多成1厘，唔使玩過山車，足以嚇到個心離一離，大家見有乜勢色唔對就沽債套現，意味過往由超息低環境推高資產價格嘅歌仔好快唱完，負利率令存款為主嘅金融體系混亂，基金大戶到小存戶回報被蠶食，睇嚇日本同德國民眾搶保險箱囤積現金就知。
Captain Cool
https://www.facebook.com/seeforcaptain/
本欄逢周一刊出
Captain Cool
經濟客艙 - Captain Cool 舊文
來源 source: http://hk.apple.nextmedia.com