財金冒險號：
滯脹殺到買乜好？
■全球皆見通脹苗頭，有閒錢可買定iBond之類嘅通脹掛鈎債券。 資料圖片
聯儲局前主席格老斯潘擔心嘅滯脹，如今開始見到通脹苗頭。唔單止美國，英國、歐元區、中國通脹全線升溫。自從2008年雷曼冧檔，發達地區央行都係驚通縮，扭盡六壬都要推高通脹。印咗
無數銀紙，通脹終於向目標邁進，本應鬆一口氣，奈何市場已被零息及QE搞到亂曬龍，如果通脹急升，隨時篤爆史上最大債券泡沫，爆發金融危機。有乜嘢會搞到通脹飆升？油價或者會。
油價已經由今年低位反彈38%，但按年大概持平，仲未好反映通脹指標。萬一油組出奇地齊合協力減產，加埋特朗普當選，油價就好可能再挾高啲。睇番2012年美國通脹（核心PCE）曾升越2%目標，但之後油價見頂，而且失業率仍高達8%，人工無乜得加，通脹至回落。今日美國已接近全民就業，人工加多咗，通脹就會逐步升。
耶倫當然都留意到通脹升溫，但佢冇有怕，忽然提出「高壓經濟」政策，即係為求刺激經濟持續復蘇，可容忍通脹暫時高於目標。耶倫明年仲有冇得撈都未知，視乎特朗普會否爆冷勝出炒佢魷，但聯儲局多年來都係製造泡沫，冇邊個好似伏爾克（Paul Volcker）咁果斷加息，邊個做都好，通脹都係易升難跌，有閒錢可買定啲通脹掛鈎債券，香港iBond或美國TIPS都得。
笑笑生
mailto:sneeringman@gmail.com
本欄逢周四刊出
笑笑生
財金冒險號 - 笑笑生 舊文
來源 source: http://hk.apple.nextmedia.com