炒地產股要逆向
2016年10月20日
港股反彈一日後無力再上，喺宏觀數據無乜變化下，個市缺乏方向。人仔匯價向下回落一輪後變動減少，亦令市況膠着。
十月份人民幣入籃，加上美國聯邦儲備局走嚟放鷹，令美匯走勢轉向，人仔向下回落，搞到內地B股散咗，港股都腳軟跌低。昨日新華社仲發表文章稱，近期人民幣對美元匯率下跌主要
是受美元走強影響，未來人民幣匯率雙向浮動將成常態，考慮到中國經濟基本面依然穩健及人民幣國際化進展，人民幣並沒有趨勢性貶值基礎。
官媒暗示人仔壓力未除
呢個報道係引述國際貨幣基金組織(IMF)亞太部副主任馬克斯‧羅德勞爾稱，人民幣匯率似乎已成功從緊盯美元轉向參考一籃子貨幣調節，變得更加市場化和靈活，短期內押注人民幣匯率單邊貶值的投機力量已減少。
雖然文章引述佢話，中國經常項目保持順差、外匯儲備充裕、金融體系穩健等因素，決定人民幣匯率的下行不太會演化為長期趨勢。但要留意佢話，短期人民幣仍然會受壓，所以大圍投資氣氛仲係好審慎，大家都唔敢出重注去買，形成個市都仲係好觀望。
美息將升未升，全球貨幣暗藏變數，令到好多貨幣同資產價格都難落注，除咗人仔外，鎊價呢排都受壓。過去本地財團都會分散資產買吓英國物業，好似麗新國際(191) 同麗新發展(488) 過去都有買吓倫敦物業。兩間公司喺業績公佈時，管理層被問及近期英鎊貶值，會否加大在英國的投資，副主席兼執董周福安表示，目前於當地的收租物業有約6厘回報，未來於英國收購物業有6厘回報才會作考慮，4厘或以下不會作考慮。麗新國際公佈截至7月底止全年業績，純利6.83億元，按年跌47%；每股盈利0.361元；派末期息1.21仙，去年同期為1.1仙，股價無升跌。麗展同期純利11.48億元，按年跌43%，減少乃由於投資物業重估大幅減值所致；每股盈利0.045元；派末期息0.19仙，佢昨日收報0.159元，升咗0.6%。
麗國系早前曾供股集資，其中部份資金可能去英國買嘢。聽周福安語氣，可能短期會觀望啲。呢排麗新喺將軍澳有個樓盤開售，呢個盤塊地臨海，位置都幾靚，但買時就創咗新高價，好多人估佢呢次論盡，點知雖然區內新盤多，但因為近排市況仲係OK，若然順利開售，佢又好大機會賺錢，所以呢十年嚟做香港地產，如果守得住就賺錢機會仲係好大。
麗國系喺樓市低迷時供股，搞到小股東抽水有怨言，但過去幾個月麗國升勢跑贏唔少地產股，估計亦預支咗開盤有錢賺的好消息。睇番同區有盤開的會德豐國際(020) ，副主席梁志堅繼續減持，可能醒目仔都喺樓市低時炒地產股，樓市高時沽地產股，實行逆向嚟炒。會德豐就跌1%，報收46.3元。
大市昨日悶悶吓，收市報23304點，跌89點；國企指數收報9641點，下跌78點，成交545億元。藍籌股個別發展，國壽(2628) 與聯通(762) 齊發盈警，加上瑞銀憂聯通營運表現，續予「中性」，兩股股價受壓，國壽造20.15元，跌2.66%，為全日跌幅最大藍籌；聯通造9.46元，跌1.36%。
吉利威水股價再創新高
昨日最叻股係之一係吉利(175) ，股價再創新高，一度高見8.45元，升4.26%，收報8.3元，升2.6%，仲帶動埋其他汽車股大致向好。內地要保住經濟，唔敢狂谷樓市，一升就要打壓，汽車消費就更形重要，令汽車股今年表現好旺，尤其好似做賣SUV的車廠成為主要贏家。汽車經銷商都同步上漲，寶信汽車(1293) 爆升6.4%，報2.5元；正通汽車(1728) 亦漲4%，報2.57元。
陸羽仁
金融High Tea 舊文
來源 source: http://hdfin.stheadline.com