強美元震散航空股
2016年10月14日
港股昨日再插，而且都跌得幾慘烈吓，過千隻股份下跌之餘，雖然大市仲有23000點，但個別弱勢股仲插到見咗一年新低。
見新低之一股份係發公告「自爆」嘅國泰航空(293) ，佢下半年收益持續遜於預期，等如係發盈警，股價於公佈後即向下插，大跌4.7%，收10.26元，創出多
年低位，自2008年金融海嘯以來入貨者好多都要輸錢。
國泰自插股價見新低
國泰早前公佈業績，如果唔計國航收益，公司本身已經見紅，派成績表後惹來外界批評點解公司無發盈警，質疑事前淨係公佈營運數據，外界未必理解，而且運力唔代表收益率，不能話有發表數據就唔盈警，國泰管理層吸取教訓，於是今次來個自爆。
陸羽仁去年睇好國泰，今年就一直睇淡，早排見到公司透露，話訂購新飛機會縮窄座位，就知呢鋪唔係幾掂。雖然公司對呢樣嘢低調處理，但國泰機票普遍比人貴，座位縮細點設計都好難搞到客戶滿意，呢點相信管理層心知肚明，咁都要出此下策，可見環境有幾惡劣。但咁做可能會令公司高檔形象進一步削弱，有點惡性循環嘅味道，當時其實股價已陰陰跌，反映大戶基金一樣聞到味道。昨日壞消息曝光，股價再插就唔令人意外。
陸羽仁唔係咁睇好國泰業績，主要係覺得佢業績唔得唔止係周期波動，同時與行業大氣候有關，佢過去在本地壟斷優勢被打破，突出咗佢成本高、票價貴嘅薄弱環節，呢種範式轉移，好多普羅投資者唔明白，以為人棄我取，結果證明散戶智慧係鬥唔贏基金嘅專業分析囉。
國泰轉弱，見到個價殘晒，其他股份在大市三連跌下，同樣受壓。國泰自插完，大行立即唱淡，股價應聲挫4.7%，收10.26元，為包尾藍籌股。據匯豐證券估計，國泰2016年全年純利差過市場預期，加埋本港機場引入建設費後，對國泰的乘客收益率受壓引致。佢認為國泰乘客收益率蠶食比估計勁，故將2016年純利預測由原先賺30.63億大幅下調至虧損3.77億，並估計2017至2018年的股本回報率會錄得負數，評級由「持有」降至「中性」，目標價由12.5元降至10元，折合0.7倍市帳率。
人幣持續貶值下，內地航空股也捱沽，東方航空(670) 跌0.56%，造3.57元；南方航空(1055) 下滑1.8%，造4.35元；國航(753) 降3.4%，造5.06元。內航股散埋，主要係強美元效應，內地航空公司好多借咗美元債買飛機，人仔弱，美元強，就搞到佢哋都無運行，成個板塊散咗。
人仔中間價連跌七日
美元獨強，官方人民幣中間價連跌七日，投資者擔心人幣再冧下，恒指收市再插375點，險守兩萬三關，雖然U盤跌勢略收窄，最終恒指收報23031點，仍下挫375點；國企指數收報9496點，跌176點，已經失守咗50天線(23194點)，為逾三個月來首次。大市成交增9%至745億元，連瀉四個交易日後共瀉921點。
喺咁嘅環境下，藍籌股普遍下跌，隔夜油價下跌逾1%，早排升唔少嘅油田服務股沽壓特別巨，百勤油服(2178) 、安東油田服務(3337) 瀉逾7%，三桶油也全線下滑，中海油(883) 下滑2.5%，造10.18元；中石油(857) 跌2.7%，造5.32元；中石化(386) 降2.8%，造5.66元。咁多成份股中，唯有華潤電力(836) 上月售電量大升，漲升1.8%，成為逆市奇葩，造13.5元，為升幅最大藍籌股。另專注於提供翻新服務的建築承建商IBI Group(1547) 周五掛牌，於上市前夕暗盤價升逾兩成，一手賺800元。
陸羽仁
金融High Tea 舊文
來源 source: http://hdfin.stheadline.com