做生意要識甩包袱
2016年10月19日
港股插至近兩萬三千點，好友終於反攻，借住人仔稍為企穩同經濟數據彈番一彈，但升勢係咪持續仲要睇住大環境，包括外圍同人仔走勢。
藍籌反彈基本上跟大環境，中環茶友話題係電視廣播(TVB)(511) 落實高層變動，「殼王」陳國強同有「中國梅鐸」之稱的華人文化產業投資基金董事
長黎瑞剛齊齊亮相，公佈委任佢做副主席的消息。中國梅鐸話將專注於TVB的策略計劃及長遠企業目標發展，不會參與公司日常運作，佢強調全球說粵語的人口超過一億人，粵語市場仍然值得重視。
「中國梅鐸」唔信電視無得做
近年電視廣播前景經常被唱淡，甚至覺得係傳媒大亨邵逸夫高價甩出嚟的舊包袱。近年中國梅鐸就陸續加注，佢當然唔同意外間睇法，話TVB的價值被低估，股價及盈利均有上升空間，更指出電視廣播有三大優勝之處，TVB在華人社會品牌價值仍高，片庫充裕，營運體系成熟，不同意網上對電視廣播的批評及揶揄，仲話即使香港只有七百二十萬人，TVB亦不應放棄粵語市場。
對中國梅鐸呢個講法，中環茶友話佢買得TVB當然係信佢得，從佢過去投資眼光同視野，梗係同坊間指指點點的批評份量唔同。聽講講唔信網視可以取代電視，似乎重點就同現有管理層唔完全一樣，呢個都係老闆普遍心態。正常嚟講，市場發生變化，老闆梗係唔想放棄舊有陣地，夥計話要用新戰術打新市場，老闆話咁無問題，不過咁唔代表舊戰場要放棄喎。即係現時TVB要搞機頂盒，中國梅鐸當然贊成，但舊有的電視市場同香港廣告收入，都一樣要撐住。
做生意要順應時勢，昔日成功的做法有時會變成包袱，阻住發展，但有時舊包袱丟得太快，又會連好嘢都拋棄埋，點樣替舊換新要有大智慧，O依家中國梅鐸喺公司影響力多咗，就要睇吓佢點樣為公司方向加入新元素同視野嘞。喺副主席露面後，TVB股價唔見得特別興奮，隨市升咗0.5元，收28.95元。
至於大市借住內地9月新增貸款比預期勁，加上滬深A股急升逾1%，港股喺外圍偏軟下反彈，恒指全日飆356點，大市成交轉旺達599億元，比上日增11.8%。恒指收報23394點，急漲1.55%；國企指數收報9720點，上揚1.88%。
藍籌股大致造好。中海外(688) 季績省鏡，首九個月經營溢利升29%，當中第三季更大升1.11倍，推動股價午後抽升，收造24.8元，揚4.86%，為升幅最大藍籌股。另一內房大股華潤置地(1109) 都升3.4%，造20.05元。
YGM斬纜股價急彈
講起甩包袱，呢排股仔好多動作消息，冷門股YGM(375) 擬售Aquascutum業務，股價爆升62.85%，收6.4元，呢隻股由老牌家族陳瑞球擁有，主要係第二代打骰，過去佢幾常有佳作，包括多年前發展品牌HANG TEN，後來出售獲利，佢對股東都唔錯，有錢賺就派高息，所以長年小股東收息都早已回晒本。最近幾年自由行來港大旺，佢賺錢之餘仲買入呢次想出售的英國老品牌，點知遇正自由逆轉，呢瓣業務全面捱打，股價不斷潛水，昨日就算彈得勁，但都只及高峰三分一，O依家壯士斷臂好過不斷失血。做生意唔係贏就係輸，無話鋪鋪你講晒，管理層最緊要係有誠信同埋識得應變，小股東都會明白投資係有風險的。
至於另一隻傳賣殼炒上的王氏港建(532) 繼續微升，收報1.08元，再升2仙，成交有二千幾萬，都仲好熱鬧，佢股價好壞就要睇賣盤成唔成事，成事個價可以仲高好多，如果想食點胡，最好都分段賣，唔好一次沽晒。
陸羽仁
金融High Tea 舊文
來源 source: http://hdfin.stheadline.com