中環在線：
長實「海之戀」勢掀純愛風
長實地產（1113）即將推出嘅荃灣西站新盤「海之戀」，由命名到推廣，相信都係最令人毛管戙嘅新盤。
地盤噚日掛起「海之戀」三隻大字，大家睇
到嘩嘩聲，皆因呢個樓盤名唔似樓盤名，反而令人聯想起壽司「花之戀」、餅乾「白之戀人」。如果上網google海之戀，仲會出現上世紀80年代一套國產電影同內地骨場。
記招響起《霧之戀》
長實舉行記者會推盤時，仲由66歲嘅「樓神」趙國雄即席獻唱兩句譚詠麟舊歌《霧之戀》掀序幕。樓神面都唔紅咁解畫：「（盤名）可以唔同角度咁表現我哋對香港嘅愛、對家庭嘅愛」，樓盤名係由部門集體創作，經老闆李嘉誠拍板先出街。
長實高級營業經理封海倫亦豁出去，指「海之戀係一個充滿愛嘅樓盤」。而「愛」呢個字，記者會上出現至少10次，搞到現場成地雞皮。
網民當然隨即搭嘴，網絡作家向西村上春樹就話，未來業主搭的士返屋企，一定要好有勇氣先可以擺脫尷尬，講得出「吖司機，唔該去海之戀呀」。
假如呢一種肉麻當有趣嘅宣傳持續，市場人士想像緊，項目唔同座會唔會叫單戀、暗戀、相戀、失戀、愛戀，又或者之後拍「戀戀藍巴勒」、「真的海之戀」一類嘅短片，挑戰市民嘔吐底線。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com