收市閒情：
樓市需要一份浪漫
■長實嘅土豪樓盤之始，應該要數大坑名門。 資料圖片
驚天動地嘅樓盤名往往令人讚嘆不絕，「咁你都改得出」。行業龍頭長實（1113）當然走在時代尖端，荃灣西新盤「海之戀」，一對小情侶行入去，「BB，我送『海之戀』畀你」。
好多人話，要對住的士大佬講「海之
戀」呢個名講唔出，我唔信你咁多年來，未試過喺壽司舖落order時講「我想要花之戀」。何況當你已被訓練到連「司機，我想去凱旋門」「我想去帝峰．皇殿」都講得出，「海之戀」？濕濕碎啦。
地產商改名，講都尾都係標題黨，嗰期興咩咪改咩名。70、80年代經濟起飛，人人有個發達夢，銀禧花園、得寶花園，直截了當。到90年代至2000年，大家開始知咩係品味，聽濤雅苑、翰林軒呢類咁有文化氣息嘅盤名都係長實出品！
到底香港樓盤名幾時開始走火入魔？個人認為，長實首個土豪feel樓盤，應該要數大坑名門，05年改嘅；新地（016）凱旋門同樣震驚全港，都係05年開始預售樓花。2005年，正正係中國滙改開始，人民幣升值，之後樓價嘅飆升；亦係呢年開始，樓盤就越來越土豪、浮誇。
邪嘅係長實樓盤名改得越霸氣，出事機會越大。名門？豪宅？最新錄二手成交，1,752方呎單位4,080萬元易手，業主唔單止勁蝕700幾萬，成交價仲平過一手價。08年開售，明明唔喺何文田，但就扮係何文田地段嘅半山壹號，更加係九龍區首屈一指長蝕蟹貨豪宅！2010年開賣，聲稱「一脈相連九龍塘」，位於大圍但完全唔近港鐵站嘅名城，更堪稱新晉蝕讓王。不過對長實嚟講，只要一手開賣嘅時候滿足到市場「土豪」嘅需要，就OK啦。
今次長實一改風格，「海之戀」唔土豪兼冇霸氣，唔似target內地客，仲好浪漫。樓盤名係時代嘅產物，浪漫，可能係市場需要。就好似東晉時政治腐敗，民間逃避現實，就寄情山水，發展出追求浪漫嘅時代一樣，都係市場需要。
千頌C
http://www.fb.com/winbigwok
本欄逢周三刊出
千頌C
收市閒情 - 千頌C 舊文
來源 source: http://hk.apple.nextmedia.com