智取大市：強股重臨要翻兜
■吉利銷售數據完全未有走樣跡象。 資料圖片
通脹概念又好，特朗普概念又好，優質股又好，升勢似乎開始蔓延到更多板塊。不過短炒即抽即獎機會確實唔多，似乎需要一點兒耐性去坐貨，因為市況好轉初期，唔少人仲覺得上落市未完，有糊唔食、罪大惡極心態仍然濃厚，於是股份即市
早段向好的話，尾市隨即迎來食糊客嘅沽壓，好容易跟埋沽。只要捱過偏弱嘅下晝，第二日通常會造好，因為唔畀呢班炒上落嘅短線客，有低位再上返車。所以手上有貨，升勢未改變，就坐落去吧。
商品股、賭股變成強股新勢力，零售股都開始翻生。不過，騰訊（700）就由強勢淪為弱勢，實在出乎意料之外，究竟呢類股強勢真係過咗氣、定係純粹唞嚇氣？要分辦唔難，騰訊升市又跌、跌市又跌，證明弱勢畢呈，但有部份強股，跌市跌得大大力，升市又拿拿聲好得返，證明資金驚買唔切，吉利（175）就係一例，由9蚊閃崩到7蚊邊，話咁快衝上8蚊樓上，動力就係唔簡單。
繼續覺得吉利未玩完嘅原因唔難理解，傳統車又賣得、電動車又起飛，銷售數據完全未有走樣跡象，10月銷量仲要較9月銷量增長26%，強到無朋友，如果估值要力追比亞迪（1211），仲有三成可以升。
晉佳
http://www.fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.apple.nextmedia.com