收市閒情：
「葉劉」式sales skill
■「葉劉」式嘅博同情手法已經唔work。 資料圖片
成世人流流長，總會遇過最少一個保險agent，問你一個好哲學嘅問題：「你有咩人生目標？」喺你連自己𠵱家都唔知自己做緊咩嘅時候，問你有咩目標，規劃人生咪就係呢啲？學黃子華話齋，你試嚇答：
「我希望世界和平。」佢會話畀你聽，「唔係呢啲呀」。你就知原來「世界和平」呢個普世價值原來都有錯嘅時候。
不過佢識問你有咩目標，都仲證明呢個sales意圖去為你度身訂做一個啱你嘅產品，最後個產品啱唔啱你係後話，最少佢做足身為sales應做嘅門面功夫。最怕有啲agent連「顧客至上」嘅門面嘢都唔做，佢係sell佢自己有幾慘！唔係講笑，有日有個「朋友」突然約食飯。好啦，食飯update近況係常情，言談之間講嚇屋企人都合情合理。講講嚇屋企佢突然爆句：「我媽媽之前生cancer。」
之後佢係咁講自己幾慘、媽媽幾慘，最後「朋友」話媽媽無事，咁當然值得開心。但原來戲肉就係：「其實天有不測風雲，人有霎時之cancer，好在我媽媽當時有買保險，如果唔係blah blah blah……其實我𠵱家做緊保險！」神奇！頂級！超卓！殺我一個措手不及。
當然我最後唔幫襯！但又幾好笑喎，你sell我嘢，你唔問我想要咩產品，一味同我講你自己有幾慘，做咩啫你？Sell嘢唔係咁sell！
即係好似葉劉咁，你講你俾人睇低，一個女人仔冇人撐，俾人歧視，受了幾大嘅委屈，咁同你選特首有咩關係？課金係想解決自身問題，你要同情？過主啦。
作為一個sales，應該主力focus自己product有幾好，踩其他人？唔係唔得，但前提係有point。「有啲hea住做」，咁點hea，唔講。即係你sell保險，你唔會無啦啦踩人場同人哋啲客講，「人哋個plan唔好㗎」然後？冇然後啦，因為自己根本未夠班同人鬥。
葉太，sell嘢真係唔係咁sell， to sell or not to sell？好嘅agent，客，會自己搵上門。
千頌C
http://www.fb.com/winbigwok
千頌C
收市閒情 - 千頌C 舊文
來源 source: http://hk.apple.nextmedia.com