恒盛股價「揪來揪去」
2016年11月02日
十一月開波，港股暫扭跌勢，升番上兩萬三樓上，但大股都係個別發展，反而個別股仔或者成個板塊動起來。最明顯有異動嘅係芯片股。中芯(981) 重上一元大關，收報1.01元，揚7.5%，刷新六年半高位，由佢帶動其他晶片股都炒上，先進半導體(3355
) 揚3.28%，造0.63元；華虹半導體(1347) 漲0.87%，造9.26元；晶門(2878) 大升8.22%，造0.395元。
中芯上市已經可以話傷左唔少股東嘅心，當年特區政府啱啱回歸，董建華做左特首，提出要大搞科技。事隔二十年，從美國矽谷經驗董伯伯嘅眼光係無錯嘅，可惜係香港只係變左個數碼港嘅地產項目出來。當年同數碼港同一時間，有人提出喺香港做硅港，呢個項目同樣想攞平地，最後唔成功，發展藍圖畀上海攞左，最後係內地落戶，呢個就係中芯嘅來頭。由於佢有咁嘅背景，所以中芯上市，有名嘴大聲唱好抬轎，可惜內地搞芯片，始終係初哥，只能做到入門水平，根本賣唔到錢，所以中芯股價長期低迷，輸到小股東阿媽都唔認得，若然唔肯認輸長期抗戰咁就仲傷。
中芯狂交學費捱出頭
中芯上市十二年，交左唔少學費，近年生意先有改善。據公司公佈截至6月底止中期業績，純利1.59億美元，按年升20.34%。幾間大行都睇好佢嘅增長，麥格理相信中芯(981) 個別產品有需求，喺來年會擴大產能16%，未來3至4年可達至複合增長20%的目標，認為內地客戶對晶片需求強勁，加上中芯與客戶關係密切，估計可跑贏同業。O依家佢市盈率20倍，衝破之後有可能要消化吓。
芯片股同大市向好，理由同內地官方與非官方製造業PMI好過市場預期有關，所以製造類相關股價升得啲。恒指全日最多升334點，高見23268點，收報23147點，漲212點；國企指數收報9706點，上升146點，成交金額656億元。大摩發表報告唱好中國神華(1088) 短期股價表現，神華股價飆6.4%，造17.18元，以咁大隻傳統資源股算係好勁。
恒盛地產(845) 呢排股價「揪來又揪去」，主要係跟隨大股東私有化計劃消息波動。恒盛曾提出私有化失敗，近年再度提出，但拖左好耐都未有具體方案。喺八月份時公司將提出私有化方案的期限申請拖至十月底，令人憧憬大股東出招，股價爆上一元。到十月就嚟完，公司又無動作，於是股價大插到0.9元邊。到十月過去，公司公佈再將期限拖至十一月份底，股價聞訊爆上，收報1.13元，升左20%，創埋一年新高。點解佢股價會掉頭？睇真啲佢嘅公佈，披露大股東需更多時間作最終籌備，以取得可能私有化所需資金，因此向執行人員提交申請將最後期限。從佢嘅意向顯示大股東有進一步推進計劃。
虧損嚇人最宜私有化
睇番恒盛盤數，佢中期虧損擴大逾1倍至19.9億元人民幣，相當嚇人。管理層解釋，虧損擴大主要因房地產合約銷售較去年同期減少，加上物業年內建設期和開盤時間分佈不均勻，以及若干物業項目的建築期過長，導致物業銷售均價雖有增長，但整體銷售金額依然偏低。
恒盛帳面淨值1.9元，就算急升後成間公司市值只係88億元。據公司自言截至6月底止，已取得土地使用證或已簽署土地收購合同的土地儲備總量為800萬平方米，可滿足未來五年以上開發所需，平均樓面土地成本為每平方米1810元。佢嘅地皮唔少喺上海等地區，睇完就明白點解大股東想趁呢個時候私有化。當然，呢類公司大股東算到咁盡，買佢博食大茶飯真係膽汁同持貨能力少啲都唔得。
陸羽仁
金融High Tea 舊文
來源 source: http://hdfin.stheadline.com