Money Walker - El. 2016年11月2日
Money Walker：
咁易有「內地機遇」咩
■現時出現人民幣越弱，反而越多內地人來港消費的奇怪現象。 資料圖片
人仔今輪貶值已迫近6.8嘅所謂「新鐵底」，大陸亦開始緊張起來，唔單止多咗出來重覆誦唸「人民幣不存在長期貶值基礎」，亦禁止內地人使用銀聯卡購買投資性質保險。
雖然中央本身有意容許人仔走弱，以加強內地出口競爭力，但貶值太快可能會造成市場恐慌，重演去年8.11新滙改局面，所以當局相當重視貶值速度是否受控。只要速度受控，大陸對人民幣所劃下嘅「鐵底」，根本可隨刺激經濟需要，不斷搬龍門往下移。
如果人民幣近期咁快咁急嘅貶值持續，大陸有錢人將更心急來港購買資產，甚至乎連內地一般平民都會抱住遲買貴幾嚿嘅心態，盡快來港囤積日用品，造成人仔越弱反而越多內地人來港shopping嘅怪現象。當然上述情況只能短暫維持，畢竟阿爺已開始出手抵擋貶值壓力兼堵塞走資渠道，但無論點堵塞，相信資金都總有逃出渠道，當中多少亦會有部份漏到香港來。
話時話，有人話香港黃金時代已過，呢代年輕人嘅就業同搵錢機遇，係從內地走資中尋求角色。筆者就覺得內地有幾多錢要走、下一個走資渠道係乜、走到幾時會被封，一般香港人永遠無法掌握，呢啲所謂嘅內地機遇既不安穩亦不長久，只能視之為搵快錢途徑。
El.
http://fb.com/moneywalkerhk
本欄逢周三刊出
El.
Money Walker - El. 舊文
來源 source: http://hk.apple.nextmedia.com