Can Bank - 散子 2016年12月20日
Can Bank：十年後的上車盤，我恐懼
■如果驚十年後上車要800萬元，散子更驚到時上車盤只有80呎。 資料圖片
散子一向有上唔同討論區瀏覽嘅習慣，睇嚇今期興啲乜，雖然未至於認同師兄嘅意見，但起碼都知現時啲人諗緊乜，睇嚇自己有無脫節。而最近睇到一個話題係估嚇十年後上車盤使唔使800萬元。
相信同大部份人一樣，留意到個標題係因為散子仲未上到車，都好擔心上車盤要800萬元的話，就形同殺人犯被判謀殺，唔係死刑都終身監禁，呢世無機會喇。但諗真啲，點解大家會驚上車要800萬元，而唔係上到間80呎嘅車（樓）？
其實香港家庭「規模」越來越細，住宅面積越來越細都無可口非，不過，細到越來越難住似乎有啲過火，雖然可以做到入場費降低，呎價無減過，呢種方法同英鎊貶值，英國朱古力同一個包裝但量減少無分別。
朱古力仍然會有人買，同樣地百幾呎上車盤仍會有人入場，問題只係朱古力少到咩地步先會被消費者杯葛？屋細到咩地步先會無人願買？驚十年後上車要800萬元？散子更驚到時800萬元的上車盤只有80呎。
散子
本欄逢周二刊出
散子
Can Bank - 散子 舊文
來源 source: http://hk.apple.nextmedia.com